Madaxweynihii hore ee Soomaaliya Shariif Sheekh Axmed ayaa kashifay ballan uu madaxweyne Maxamed Farmaajo uga baxay madaxweynihii hore ee Soomaaliya Xasan Sheekh Maxamuud, iyadoo uu ku kulmiyey magaalada Garowe, markii halkaasi loo joogay caleemo saarkii Madaxweynaha Puntland Siciid C/llaahi Deni.
Sheekh oo ka hadlayay munaasabadda daah furka xisbigiisa Himilo Qaran ee maanta Muqdisho ka dhacday ayaa qeyb yar ka sheegay wixii dhex maray Xasan Sheekh iyo Farmaajo oo uu isagu isu keenay markii Xasan Sheekh lagu eedeeyay inuu wado olole lagu duminayo dowladda uu hoggaamiyo Madaxweyne Farmaajo.
“Waxaa Rabaa inaan idinkaga sheekeeyo arrin dhacday aniga iyo Madaxweyne Xasan sheekh-na na dhex martay waagii aan joognay Garowe, waxaa lagu xaman jiray inuu rabo inuu dowladda rido, gaar ayaan ula baxay waxaan ku iri: sidee wax u jireen.., wuxuu i yiri: waxba kama jiraan, gacanta ka qabtay waxaana u geeyay Madaxweyne Farmaajo, waxaa iri Madaxweyne ninkaan wixii lagu xamanayay waa beeniyey, wuxuu ogol yahay in labadaada sano dhammeysto… laakiin wuxuu rabaa cabashadiisa inaad dhageysato, waa yahay ayuu yiri, waana balameen, laakiin ilaa iyo hadda la isma arkin…” ayuu yiri Shariif Sheekh Axmed.
Sheekh Shariif wuxuu kaloo si xeeladeysan u dhaliilay madaxweyne Farmaajo isagoo sheegay in qofka markii la doorto uu ku dhaco jinni diidaya inuu dadka kale wax la wadaago. “Marka qofka Soomaaliga la doorto, jini ayaa ku dhaca, jinnigaas waxaa la yiraahda, anaa la i doortaye maxay rabaan dadka..? War fariista. Aaamusa, laakiin muddo haddaa joogto waxaad ogaaneysaa inaad tahay qofka ugu daciifsan, maxaa yeelay culeys kasta adiga ku saaran yahay..” ayuu yiri Shariifka oo xaaladda dowladda hadda jirta ku tilmaamay in waxqabadkeedu liito.
