Madaxweynayaashii hore ee Soomaaliya Xasan Sheekh Maxamuud iyo Shariif Sheekh Axmed ayaa shir jaraa’id oo ay wadajir u qabteen uga hadlay xaaladda dalka, Doorashada, Ciidamada Itoobiya ee aan ka tirsaneyn AMISOM iyo xilliga kal guurka ah.
Shirkan Jaraa’id ayaa ka danbeeyay kulan gaara oo ay wada yeesheen Madaxweynayaashii hore iyo guddoomiyaha Baarlamaanka Maxamed Mursal Sheekh iyo ku xigeenkiisa koowaad C/weli Muudey, laakiin ma jirin wax faahfaahin ah oo ay kulankaasi iyo wixii looga hadlay.
“Doorasho Qof iyo Cod ah oo lagu celceliyay.. waxaa la is weydiinayaa Goormee dhacee.. iyo Sidee u dhacee..? Amni ahaan, siyaasad ahaan waxa nala tahay inaysan suuragal ahayn” ayuu yiri Sheekh Shariif oo caddeeyay in dowladda Federaalka iyo maamul Goboleedyad ay kala fogaadeen, amniguna aanu saamaxeyn doorsho noocaasi ah.
Sheekh Shariif ayaa sheegay haddii uu waqtigu ku dhammaado dowladda hadda jirta iyo Madaxweynaha, ayna dhici weyso doorasho ay wax kasta dhici karaan, wuxuunas oo jeediyey in hadda in wadahadal laga galo arrinta Doorashada.
Madaxweynihii hore Xasan Sheekh Maxamuud ayaa isna Sheegay inay nasiib darro tahay halkii laga dhisi lahaa dowladnimada inay shaki badan ka jiro sidii doorasho loo qaban lahaa.
“Doorashada waa arirn na hortaagan iyo mushkilad xal rabta. Qaddiyadda 2020 waa in laga hadlaa wax la qarsan karo maaha. Doorasho 4 bilood muddo ay ka dhiman tahay in la dhaqan geliyo suuragal maaha.. Disembar 2020 waa inuu Baarlamaan cusub oogo.. Febraayo 8, 2021 waa inuu madaxweyne la doortay jiraa.. haddii la qaban waayo oo xilligaas la tago loo fadhin maayo..” ayuu yiri Xasan Sheekh oo intaas ku daray inay su’aal ka taagn tahay Doorasho ma dhaceysaa mise ka dhaceyso?
Mudane Madaxweyne Albaabka fur adaa reerka oday u ah.. haddii aad dadka isk u dooni weydo, laguu fariisan maayo. Madaxweynaha waan u caqli celineynaa: xilkaada inta ka dhiman Madaxweyne ayaad tahay.. waqtigaada haddii uu dhammaado annagaa nala mid tahat..” ayuu si cad u yiri Xasan Sheekh.
Wuxuu ka dhigay dib udhac, dagaal inuu dhaco iyo is-jiid jiid. “Madaxweyne waqti ayaa kugu socda… go’anka adigaa iska leh, go’aan kastaa oo qaadata wixii ka dhasha adigaa qaadaya mas’uuliyadiisa.. Wixii sharci ah lagaaga xishoon maayo..” ayuu ka mid ahaa hadalladii uu jeediyey Xasan Sheekh.
