Sheekh Maxamed Cabdi Umal oo ka mida culimada Soomaalida ee fadhigiisu yahay dalka Kenya ayaa ka hadlay xaaladda magaalada Laascaanood ee Gobolka Sool oo dagaal ka socdo maalmihii ugu danbeeyay.
Sheekha oo Khudbadii Jimcaha ka hadlay xaaladda Laascaanood ayaa sheegay in magaalada Laascaanood ay ka duwaneyd magaalooyinka Somalilnad ee nabadda iyo horumarka heystay muddo 30 sano ah, ayna ka dhacayeen dilal lagu leynayo haldoorka degaankaasi.
Maamulka Somaliland ayuu sheegay inuu ku fashilmay waajibkii ka saarnaa sugidda Amniga dadka Laascaanood, taasina ay ahayd khalad, kadibna markii ay dadkii magaalada adkeysan waayeen oo ka bannaanbaxeen aysan habooneyn in dadkaas xabbad lala dhaco.
Sidoo kale Sheekh Maxamed Cabdi Umal ayaa sheegay in Somaliland aysan ahayn inay dagaal ku qaado Laascaanood oo madaafiic lagu rido markii ay dadkeedu go’aansadeen inay midnimada Soomaaliyeed raacaan.
“Anoo og Soomaaliga maanta jooga akhrintiinsa, fahamkiisa iyo miisaankiisu inuu qabyaalad yahay oo in badan dhihi doonaan wadaadka waxa ka hadlinaya waa Qabyaalad, ayaan dan ka lahayn.. Xaqa inuu cadaado ayaa mhiim ah, haba qaraaraado…. laakiin xaqiiqada in la caddeeyo waa lagama maarmaan..” ayuu yiri Sheekh Maxamed Cabdi Umal.
Xaaladda magaalada Laascaanood ayaa weli kacsan iyadoo weli ay dagaalladu ka socdaan, wuxuuna sheekhu ku baaqay in dagaalka la joojiyo oo xal la raadiyo, lana joojiyo dibaatada socota.
