Waxaa la xaqiijiyay inuu xabsi ku yaala Mareykanka ku geeriyooday sheekhii caanka ahaa ee Cumar C/raxmaan oo ahaa asaasihii Jamaacadda Islaamiga ee dalka Masar.
Sheekha oo indhoole ahaa si weyna looga yiqiin dunida islaamka iyo dalka Masar ayaa in muddo ah xanuunsanaa, isagoo xabsi daa’im ku qaadanayay xabsiga ku yaala South Carolina.
Sirdoonka Mareykanka ayaa qoyska sheekha ku soo wargeliyay geerida Sheekh Cumar C/raxmaan, kadib markii xaaladiisa caafimaad ka sii dartay. Wiilasha uu dhalay sheekha ayaa wakaaladaha wararka u sheegay inay dadaal ugu jiraan sidii aabahood loogu soo duulin lahaa Masar, looguna aasi lahaa.
Sheekh Cumar C/raxmaan ayaa ahaa 79 sano jir, dalka Mareykanka maxkamad ku taalla ay ku xukumay xabsi daa’im markii lagu soo eedeeyay inuu ku lug lahaa weerarkii lagu qarxiyay Xaruntii Ganacsiga adduunka ee New York 1993, kaasoo ay lix qof ku dhinteen, kun qof oo kalena ay ku dhaawacmeen.
Sheekha ayaa qabay cudurka Kansarka, waxaana uu ahaa hogaamiyaha ruuxiga ah ee Jamaacadda islaamiga Masar oo dagaal hubeysan la gashay dowladda Masar.
Wadani.com
