Shir heer sare ah oo looga hadlayo xaaladda Soomaaliya ayaa ka dhacay xarunta Golaha Guud ee Q/Midoobay ee magaalada New York.
Shirkan oo ay guddoominayeen xoghayaha guud ee Q/Midoobay Antonio Gutters iyo Ra’iisal wasaaraha Soomaaliya, waxaa ka qeyb galay Madaxa Arrimaha Dibadda ee EU, Wasiirrada Arrimaha Dibadda ee Djibouti, Kenya, Norway, Wasiirku Dowlaha Arrimaha Dibadda ee Ethiopia, mas’uuliyiin sare oo ka socda Turkey, Sucuudiga, Shiinaha, Masar, Japan, Qadar, Imaaraadka, USA, Ruushka, Canada, Jarmalka, Sweden Iyo dalka kale oo badan. Ururka Islaamka Iyo Ururro kale ayaa iyaguna fadhiya.
Khudbaduhu waxay aad culeyska u saareen soo kabashada Soomaaliya oo la qiray, taageerana loo muujiyay. La is weydiinaya tabta ugu habboon ee gacan looga geysan karo sidii ay Soomaaliya cagaheeda isugu taagi lahayd.
Waxaa la qiray in Soomaaliya aanay sabool ahayn oo ay leedahay kheyraad badan oo dabiici ah, dad ganacsiga ku fiican, qurbo joogtuna ay abuurtay shabakad Soomaaliyeed oo dalal badan xaruumo ku leh.
Waxaa laga digay in aan cidina isku deyin in ay dib u dhigto horumarka ka socda Soomaaliya. Waxaa kale oo laga digay in aan shisheeye faraha la gelin Arrimaha gudaha ee Soomaaliya.
Khudbad uu ka jeediyay Ra’iisal wasaare Kheyre ayuu uga hadlay xaaladda dalku marayo iyo dadaalka ay dowladda Federaalka ugu jirto arrimaha horumarinta, iyo la-dagaalanka Alshabaab.
Shirkan wuxuu ka mid ahaa shirar doceedyo arrimaha Soomaaliya looga hadlayo oo ka barbar socda shirka 72aad ee Golaha Guud ee Q/Midoobay.
