Madaxweynaha Puntland Siciid C/llaahi Deni ayaa sharci darro iyo waxba kama jiraan ku timaamay wareegtooyin dhowr ah oo uu maanta soo saaray ku xigeenkiisa Axmed oo lagu magacaabay ilaa 20 mas’uul oo kal aduwan.
Qoraal uu soo saaray Madaxweyne Deni ayuu ku caddeeyay inaysan dhaqangal ahayn wareegto kasta ee uu soo saaro Madaxweyne ku-xigeenka Dowladda Puntland isagoo ku sugan gudaha Dalka Soomaaliya.
“Anigoo ah Madaxweynaha Dowladda Puntland Mudane Saciid Cabdullaahi Deni, dhawrayana masuuliyadda iga saaran illaalinta sareynta sharciga sida ku cad Dastuurka Dowladda Puntland qodobkiisa 80-aad, farqaddiisa 2-aad, fulinayana awoodaha Dastuuriga ah ee ku cad qodobka 80-aad, waxaan halkaan ku caddeynayaa in aanaysan dhaqangal ahayn wareegto kasta ee uu soo saaro Madaxweyne kuxigeenka Dowladda Puntland aniga oo ku sugan gudaha Dalka Soomaaliya”. ayuu yiri Siciid Deni
Qoraalka Madaxweynaha Puntland ayaa lagu soo gabagabeeyay amarkan: “Haddaba, waxaan farayaa dhammaan hay’adaha Dowladda in qofkastaa shaqadiisa qabsado, aanna loo hogaansamin wareegto kasta oo aan waafaqsaneyn Dastuurka iyo Qawaaniinta kale ee Dowladda Puntland sida ku cad qodobka 138-aad, farqaddiisa 2-aad ee Dastuurka Puntland.”
