Baarlamaanka Soomaaliya ayaa ka doodaya miisaaniyada dowladda Soomaaliya ee sanadka 2015, iyadoo dood kulul ay ka keeneen qaar ka mida xildhibaannada miisaaniyadaasi oo ay caadi noqotay in la keeno xilli uu dhammaad yahay waqtiga oo aanay xildhibaanadu si fiican uga doodi karin.
Doodihii xildhibaanada ka keeneen miisaaniyadda oo uu difaacay Golaha hortiisana keenay wasiiru dowlaha xilka sii haya ee Wasaaradda Maaliyadda waxay ahayd:
= In Miisaaniyadda mar waliba la keeno waqti danbe oo ciriiri ah.
= In aan lagu soo darin lacago xuquuq ah oo ka maqan xildhibaanadii dowladii KMG ahayd oo hore wax badan looga dooday la islana gartay.
= In Baarlamaanka lagu eedeeyo inuu hortaagan yahay Miisaaniyada iyo mushaarka ciidamada iyadoo waqti fiican aan siin Baarlamaanka isla markaana laga yaabo ciidamada in iyadoo miisaaniyad u taallo aan mushaar la siin dhowr bilood.
Waxaa sanadkii hore sidan oo kale dood weyn uga dhalatay Miisaaniyada taasoo keentay in mid sadde bilood ah la ansixiyo, laakiin waxaa is
weydiin leh, sidee miisaaniyad loo ansixiyaan xukuumadii fulin lahayd aan la dhisin?.
Sida caadiga ah Miisaaniyad dowladeed waxay ka tarjuntaa siyaasad iy qorshe xukuumad fulin dejisay oo ku saleysan barnaamij ay xukuumadaasi dooneyso inay fuliso sanadka, waxaa kaloo ay fasir u tahay qorshaha xukuumadda iyo dowladda hiigsaneyso. Tusaale ahaan haddii xukuumadda Cumar C/rashiid dhisi doono qorshaheeda ugu weyn ka dhigto dhismaha maamulada Gobolada iyo Ammaanka, qorshahaasina Baarlamaanku ansixiyo miisaaniyadda dowladu waxaa inteeda badan loo jeedinayaa labadaasi qodod, oo wasaaradaha qaabilsan amaanka iyo federaalka ayaa ugu kharash badanaya.
Marka aad eegto sida wax u socdeen sanadihii la soo dhaafay waxay miisaaniyadu ahayd mid wasaarad qura iska soo qorto, baarlamaankuna markii uu arrimo aan asal ahayn ka doodo la ansixiyo kadibna aan dib danbe la isugu soo laaban lana daba gelin in miisaaniyadii sidii loogu talogalay loo fuliyay iyo waxa iska bedelay. Arrinantani waxay suuragal ka dhigtay in musuq badani oon la ogeyn ka dhaco.
Waxaa la yaab leh xilligan oo xukuumad jirin in Baarlamaanku ka doodayo miisaaniyad ay diyaarisay wasaarad maaliyadeed oo aan awood lahayn, qorshaha ay miisaaniyadda ku saleysana aan la ogeyn ama yahay qorshihii xukuumadii ay kalsoonida kala laabteen..!!
Waxaa is weydiin leh sidee la isku waafajinayaa qorshaha uu la imaan doono Ra’iisal wasaaraha cusub iyo xukuumadiisa iyo miisaaniyadan hore u diyaarsaneyd?!!!. Waxaa kasii daran Ra’iisal wasaare cusub oo iska ogol kuna shaqeyn doona miisaaniyad aanu waxba ku lahayn..? taasi wuxuu micnaheedu yahay in Ra’iisal wasaaraha cusub aanu qorshe lahayn.
Wasaaradda Maaliyadda ee wasiirka uu ka ahaa Xuseen Cabdi Xalane lana filayo inuu soo laabto waxay website ay furatay ku shaaciyay miisaaniyadii 2013 iyo sidii loo kharash gareeyay… waa tallaabo fiican in la helo xitaa xisaab xirkaasi, laakiin waxaa isweydiin leh sidee loo hubin karaa in kharasha guud ahaan loo sheegay inuu baxay ay sax tahay sida loo kharash gareeyay?. Waxaan la soconaa in mushaarka shaqaalaha dowladda qaarkood oo ciidamada ku jiraan mas’uuliyiin iska qaataan. Waxaan kaloo la soconaa in deeqo laga helo dibadda aan lagu darin miisaaniyadda dowladda ee mugdi lagu maamulo.
Isku soo duub waxaa loo baahan yahay:
1. In Baarlamaanka Soomaaliya mas’uuliyadiisa qaato oo aanu ansixin Miisaaniyad xukuumad la’aan ah.
2. In xitaa haddii sidan lagu ansixiyo, xukuumadda cusub laga codsado inay dib u eegto waxna ka bedeli karto si loogula xisaabtamo.
3. In Baarlamaanku shaqeeyo guddiga Maaliyadda qaabilsanna ay daba galaan sida ay u baxeen kharashaadka Baarlamaanku ansixiyay.
4. In dowladda ciddii ay quseyso la weydiiyo deeqaha dibadda laga helo lana horkeeno Baarlamaanka.
Hiwsha ugu weyn ee baarlamaanka u taalla waa inuu dowladda kula xisaabtamaa shaqadeeda una ansixiyaa miisaaniyad cad oo aan mugdi ku jirin oo ka tarmujeysa qorshaha dowladda u degsan. Haddiiba xisaabtan jirin shaqada Baarlamaankuna noqoto Miisaaniyad ansixin oo qura waxaa meesha ka baxaya sababaha miisaaniyad loo dejiyo oo dhan iyadoo loo bedelayo lacago xaashi ku qoran oo mar qura la ansixiyo kadibna lagu kala tago.
[blockquote style=”4″]Goor dhow ayay Baarlamaanka Soomaaliya ansixiyeen Miisaaniyadii 2015. Maqaal kale oo ku saabsan qaabka loo dhigay miisaaniyadan iyo fasirkeena ayaan gacanta ku haynaa insha Allaah.[/blockquote]
Goobjooge.com
Muqdisho
[ad name=”HTML”]
