Wuxuu ahaa madaxweyne goboleedkii ugu horeeyay ee Muqdisho u yimaada Shirka Madasha Qaran ee magaalada Muqdisho ka furmay 25-kii bishan, shirkan waxaa lagu sheegay inuu yahay shir gaara oo Madasha yeelaneyso, waxaana lagu soo koobay madaxda maamulada iyo madaxda dowladda Federaalka oo ay wehliyaan wakiilada Beesha caalamka.
Shirkan waxaa ka horeeyay qorshe ay ka wada shaqeeyeen Madaxweyne Xasan Sheekh iyo Ra’iisal wasaare Cumar C/rashiid oo wakiilada beesha caalamkana si weyn ugu guuxeen oo ay la qaateen, qorshaha doorashada ee dowladdu diyaarisay wuxuu ahaa midka soo baxay shalay ee lagu heshiiyay oo kaliya af ingiriis lagu qoray, iyadoo uu shaaciyay Ra’iisal wasaaraha. (Akhri War-murtiyeedka)
Waxaa hore loo ogaa in madaxda sare ay isla meel dhigeen in aqalka hoose lagu saleeyo 4.5 oo kaliya la isku qabtay in aqalka sare lagu saleeyo 18 gobol oo ay ku adkeysteen Puntland iyo Jubba iyo in maamul goboleed lagu saleeyo oo ay doonayeen Galmudug iyo Puntland. Iyadoo taas lagu saleynayo ayay madaxweynaha iyo ra’iisal wasaaraha qorshahooda cusub ku saleeyeen.
Xafladii furitaanka ee shirka Muqdisho ayaa mar kaliya madaxdii kale ka war heleen go’aanka doorasgada Madaxweyne Xasan Sheekh shirka ka jeediyay, isla markaana uu ayiday Ra’iisal wasaare Cumar C/rashiid, inkastoo dhamaan madaxda kale oo uu ku jiro guddoomiye ku xigeenka baarlamaanka ka hor yimid, haddana cidda damaanad qaaday oo qorshaha la cabsiiyay waxay ahayd beesha caalamka (Akhri erayadii furitaanka Shirka la isku weydaarsaday).
Haddaba shirqoolka qabsaday C/weli Gaas ee keenay inuu keli ku noqdo diidmada oo hadda uu shaaciyo inuusan go;aan gaari karin ee uu dib ugula noqonayo dadkiisa waxay ahayd in qorshaha doorashada ee markii dambe lagu heshiiyay ay Beesha caalamka si buuxda u taageertay kuna cadaadisay madaxdii kale oo dhan inay qaataan, taasoo keentay in madaxweynayaasha Jubba, Galmudug iyo K/Galbeed ogolaadaan.
Ra’iisal wasaare Cumar C/rashiid ayaa si cad ugu sheegay C/weli Gaas inuu 3 xubnood oo dheeraad ah Puntland u soo dhiciyay si ay u dheeraato aqalka sare maamulada kale, intaas ka badan aanu jirin wax kale oo Puntland loo sameyn karo, wuxuuna ku adkeeyay inuu sida hogaamiye go’aan u qaato, waxaana labada nin dhex maray dood adag oo gaartay heer hoose iyo arrimo Jufo.
Ugu danbeyn waxay arrintu noqotay in C/weli Gaas keligii bannaanka soo istaago, arrintuna ay ku soo ururto inuusan go’aankaasi geyn karin ama ka soconeynin Garowe oo la ogyahay inuu cadaadis siyaasadeed beeleed ka heysto, waxaase cad inuu arrinta uga sii daray markii uu shacabkiisa ku celiyay. (DHAGEYO)
Wadani.com
