Darawal Soomaali ah ayaa magaalada London ugu geeriyooday cudurka Covid-19 ee uu keeno coronavirus, wuxuuna ka mid noqday Soomaalida qurba-joogta faraha badan ee uu galaaftay cudurkan saf-mareenka ah.
Nadiir Nuur oo ahaa 48 sano jir oo ka mid ahaa darawallada Basaska magaalada London ee ka howlgala No 394 busteejada Hackney, ayaa ku geeriyooday isbitaalka, isagoo ka tegay xaas iyo saddex caruur ah oo ay ugu yar tahay Sahra oo ah 10 Bilood jir ah, sida ay qortay warbaahinta UK.
Xaaska marxuumka oo lagu magacaabo Bishaara Maye oo 23 sano jir ah oo ka naxsan geerida saygeeda, ayaa sheegtay inuu saygeeda ahaa geesi caawinayey shaqaalaha caafimaadka ee ka shaqeeya isbitaallada magaalada London.
Waxay intaas ku dartay inuu ahaa shaqsi la jecel yahay oo dadka caawiya, isla markaana ahaa aabe wanaagan. Wuxuuna Nadiir ka mid yahay ilaa shan darawallada basaska London wada oo coronavirus u geeriyooday.
Nadiir Nuur ayaa isku arkay calaamadaha coronavirus sida qufac, isagoo ka welwelsanaa in shaqadiisa ay tahay halis, iyadoo aanu heysan wax uu isaga ilaaliyo cudurka, sida ay sheegtay xaaskiisa, waxaana la dhigay isbitaalka oo uu ku geeriyooday markii danbe.
