Taliyaha ciidamada Booliska Soomaaliyeed C/xakiin Daahir Saciid ayaa beeniyay wararka ku saabsan in xilka laga qaadayo isagoo sheegay inuu xilka sii heyn doono.
Warka Taliye Saacid ayaa yimid kadib warbixino laga qoray fadeexad maaliyadeed oo ku soo baxday taliyaha iyo cadaadis saarnaa tan iyo bartamihii bishii Ramadaan, waxaana soo baxaya xog kale oo ku saabsan xaaladaha ku wareegsan taliyaha Booliska.
Wadani.com ayaa ogaatay in taliye Saacid lagu soo eedeeyay wax qabasho la’aan iyo inuu ogolaaday falal amni darro ah oo looga sii digay, waxayna arrintan soo baxday markii uu taliyaha Booliska ka baaqsaday inuu tallaabo u qaado ka hortagga falal amni darro oo Muqdisho ka dhacay.
Agaasimaha NISA C/llaahi Maxamed Cali (Sanbaloolshe) ayay xogtu sheegeysaa inuu madaxda sare ee dowladda iyo guddiga amniga la wadaagtay xog ku saabsan wada-shaqeyn la’aan ka heysata ciidamada Booliska, iyadoo taliye Saacid waxba ka qaban waayay dhowr xog oo lala wadaagay si uu tallaabo u qaado xaalad amni darro oo lagu wargeliyay, kuwaasoo dhibaato ka geystay Muqdisho iyadoo ciidamada Booliska aanay wax tallaabo ah qaadin.
Agaasimaha Madaxtooyada Fahad Yaasiin ayaa la sheegay inuu diidan yahay xil ka qaadista taliyaha Booliska, isagoo hore uga dambeeyay in xilkan loo magacaabo, waxaana la sheegay inuu Saacid abti u yahay agaasimaha.
Hore ayaa Taliyaha Booliska looga wareejiyay arrimaha maamulka lacagta Booliska, kadib markii uu isku dayay inuu mushaarka ciidamada qaar ka mida dib u dhigo, sifo mugdi ku jiro oo musuq lagu tuhmay.
Wadani
