Wararka laga helayo magaalada Beledxaawo ayaa sheegaya inuu goor dhoweyd joogsaday dagaalkii barqadii maanta ka qarxay magaaladaasi, kadib muddo 6 saacadood ku dhow oo uu socday.
Dagaalka ayaa u dhaxeeyay ciidamada Ciidamada dowladda Federaalka Soomaaliya iyo ciidamo taabacsan Wasiirka Amniga ee maamulka Jubbaland C/rashiid Janan, wuxuuna intiisa badan ka dhacay xero ay ciidamada Janan ku lahaayeen duleedka magaalada xuduudka ku taalla ee Buuloxaawo, wuxuuna saameyn ku yeeshay magaalada Mandhera ee dhinaca Kenya.
Askarta dhaawaca ee ciidamada C/rashiid Janan ayaa la sheegay isbitaalka weyn ee magaladaasi Mandheera, waxaa kaloo isbitaalka la geeyay dad rayid ah oo dagaalka ku waxyeeloobay. Qasaaraha dagaalka ee labada dhinac ayaa si dhab ah loo heynin, laakiin waxaa la xaqiijiyey inuu dhaliyey dhimasho iyo dhaawac.
Ciidamada C/rashiid Janan ayaa ayaa laga qabdaday gaari kuwa dagaalka ah iyadoo laba kale laga gubay, waxaana dhinacooda madaafiic ku garaaceen magaalada, taasoo dhalisay inuu gubto Guri ku yaalla magaalada, ayna waxyeelo kasoo gaareen dad shacab ah.
Taliyaha Ciidamada Xooga Dalka ee Gobalka Gedo Col. Maxamed Cadow Cali Sanka ayaa sheegay in dagaalkii aagga Beledxaawo iyo xuduud beenaadka ay soo afjareen, isla markaana ay si buuxda gacanta ugu hayaan ciidamada Xoogga dalka Soomaaliya.
Taliyaha wuxuu intaas ku datay inay ciidamadda Xoogga dalka jebiyeen caddowga Kenya iyo daba-dhilifkii la socday, sida uu yiri, iyadoo qasaare weyn loo geystay, isla markaana gaadiid dagaal laga qabsaday. “Qoryaha waaweyn ee madaafiicda waxaa soo ridayey Kenya, laakiin ciidamada Xoogga dalka dheg uma dhigin si buuxda ayeyna u jebiyeen..” ayuu yiri taliyaha ciidamada Xoogga dalka ee Gobolka Gedo.
Ku-simaha gudoomiyaha gobolka Gedo Cismaan Nuur Xaaji (Macalimuu) ayaa isna sheegay in ciidamada kasoo jeeda dhinaca Kenya ay hoobiyayaal ku garaaceen gudaha magaalada Beled Xaawo ayna guryo ku gubteen.
