Taliye ku-xigeenkii ciidamada Xoogga dalka Jen. Maxamed Cali Bariise oo Madaxtooyada Soomaaliya ay shaacisay inuu xilka ka qaaday Madaxweynaha Soomaaliya ayaa kashifay inuu isagu xilka iska casilay.
Wuxuu sheegay inuu is-casilaadiisa u gudbiyey Madaxweynaha Soomaaliya laba maalmood ka hor intii uu jawaab sugayeyna uu ka War helay xil ka qaadista maanta soo baxday, isagoo caddeeyay inuu xilka isaga casilay faragelin joogt ah oo lagu hayey ciidamada oo keentay inuu go’aansado inuu xilka isaga tago.
“Warqada stiqaaladeyda labo maalmood ka hor ayaa u gudbiyay dhinacyada ay khuseysay, ma garanayo sababta maanta baraha Facebooka iyo Twitterka Villa Somalia loogu faafiyay in anniga xilka la iga qaaday, iyadoo aan jawaab rasmi ah la igu soo celin warqadii istiqaaladeyda” ayuu yiri Jeneraal Bariise oo Bishii Oktoobar uu dalacsiiyey, isla markaana taliye ku xigeen u magacaabay Madaxweyne Farmaajo.
Ma aha markii ugu horeysay ee Madaxtooyada Soomaaliya ay shaaciyeen inay casileen mas’uul xilka uga tegay inuu la shaqeyn waayey Madaxtooyada Soomaaliya, taasoo ah dhaqan siyaasadeed cusub oo kooxda Madaxweyne Farmaajo la soo baxday.
Wararka qaar ayaa sheegaya in Generaalka xilka laga qaaday uu kulan la yeeshay Madaxweynihii hore ee Soomaaliya Shariif Sheekh Axmed, taasoo keentay inay ka carooto madaxtooyada Soomaaliya.
Xildhibaan Axmed Macalin Fiqi ayaa iska shaaciyey in Madaxweynaha Soomaaliya lagu qalqaalinayo inuu Darajada ka dhigo Jen. Maxamed Cali Bariise sidii la yeelay taliye ku xigeenkii NISA Jen. Cabdalla Cabdalla.
AKHRISO QORAALKA IS-CASILAADIISA
