Waxaa caddaatay in Madaxweyne Maxamed Cabdullaahi Farmajo aqoonsaneyn dastuurka kmg, tusaale ahaan qodobbada 1, 3, 4, 10, 11, 12, 15, 16, 18, 19, 20, 21, 22, 49, 50, 51, 52, 53, 54, 55-86, 87, 90; Ayadoo Golaha Shacbiga kalsoonida kala noqday Xukuumadda RW Xassan Cali Kheyre, Madaxweyne Farmajo wuxuu ku dhaqaaqay arrimo badan oo sharcidarro ah sida magacaabidda Kusime RW ee xukuumadda Xil-Gaarsiinta, guddiga garsoorka, guddiga musuqmaasuqa, wakaaladda betroolka, magacaabidda guddiga wakaaladda Betroolka, bixinta qandaraaska ceelasha shidaalka.
Madaxweyne Farmajo wuxuu iska dhegatiray wax ka wax qabashada dhalliilaha iyo dalabka Midowga Musharrixiinta XM iyo Madaxweynayaasha DG qaarkood iyo Bulshada Ra’yidka iyo soo jeedinta beesha caalamka ee aheyd in wada hadal lagu dhammeeyo qodobbada aan waafaqsaneyn sharciga iyo heshiiska siyaasadeed iyo habraaca hirgelinta doorashada 2020/2021.
Waxaa caddaatay in Madaxweyne Farmajo ka go’aan tahay inuu rabo inuu hirgeliyo doorasho sharcidarro ah ee ka dhacda Galmudug, Koofur Galbed, Hirshabelle, iyo Muqdisho. DG Jubbaland iyo Puntland waxay geli doonan qas siyaasadeed xitaa haddii aysan doorasho ka dhicin. Doorashada gacan ku rimiska ee dowladda federaalka wadato waxay ka bilaabmi doonta Muqdisho, Jowhar, Beletweyne, Dhusamareb, Galkacyo, iyo Garbaharey. Madaxweyne Farmajo wuxuu kala irdheeyay dowladda federaalka iyo dowlad Goboleedyada iyo shacabka Soomaaliyeed Waxaa burburay kalsoonida dib u heshiinta la waday 16 sano, waxaana la maraya marxalad kala cabsi iyo kala shaki iyo isnaceyb.
Beesha Caalamka waxay u muuqata inaysan waxba qabin in Soomaaliya ka dhaco qas iyo qalalaase siyaasadeed kaddibna kaalmo bani’aadam u codsado adduunka. Sidaa awgeed, maxaa la gudboon Midowga Musharrixiinta Xilka Madaxweynaha, Musharrixiinta rabta inay la tartamaan Madaxweynaha xilka haya, taagerayaashooda iyo inta isbeddel doonka ah?Ujeedada koowaad waxay tahay inaysan dhicin doorashada gacan ku rimiska iyo in dalka iyo dadka laga badbaadiyo qas iyo qalalaase ballaaran ee dalka oo dhan aafeeya. Tallaabooyinka mudan in la tixgeliyo si isbeddel degdeg ah u dhaco waxaa ka mid ah:
1. In Midowga Musharrixiinta Xilka Madaxweynaha aysan qaban ama qabanqaabin doorasho barbar socota doorashada sharcidarrada ah ee Madaxweyne Farmajo rabo inuu maalmaha soo socda bilaabo. Xilka Guddiga badbaada doorashada 2020/2021 waa inuu noqdaa ka hortaagga iyo diidmada doorashada fowdada ah ee DF qabanqaabineyso.
Waa inaan la oggolaan in Madaxweyne Farmajo inuu cid kale ku qabsado madaxtinnimo, kaddibna la yiraahdo ha la dhexdhexaadiyo. Musharrixiinta xilka Madaxweyne ee malxiiska ah oo taagersan Madaxweyne Farmajo waa in la takooro.
2. In la sugo difaaca iyo Ammaanka Musharrixiinta iyo muwaadiniinta kale ee ka soo horjeeda siyaasadda Madaxweyne farmajo.
3. In la bilaabo ololaha baraarujinta dadweynaha xuquuqdooda iyo xorriyadooda dastuuriga ah lagu tumanayo, laguna dhiirrigeliyo in codkooda soo bandhigaan. Shirkii haweenka Muqdisho wuxuu ahaa tusaale fiican.
4. In dhammaan magaalo madaxyada DG loo diro wufuud kala hadasha Madaxweynayaasha iyo Barlamaannada DG qabashada doorasho sharcidarro ah ee aan lagu heeshiin, mucaaradkana loo oggolaado bannaan baxyo;
5. In warbaahinta lala wadaago xaaladda halista ah ee ka taagan Soomaaliya.
6. In wufuud ama farrimo loo diro dalalka Mareykanka, Ethiopia, kenya, Uganda, turkiga, Jabuti, Midowga Afrika, Midowga Yurub, shiinaha, Rushka, Ingiriska, lala socodsiinayo dhibaatada taagan iyo khatarka dalku ku jiro.
7. In Madaxweyne Farmajo la weydiisto inuu ka tanaasulo qabashada doorasho sharcidarro ah iyo ka qaybgalka tartanka xilka Madaxweynaha 2020/2021.8.
In laga wada hadlo qabashada doorasho Soomaaliya ku rida dariiqa toosan oo waafaqsan dastuur dhammeystiran, heshiis lagu yahay, ku habboon masiirka Ummadda Soomaaliyeed.
W/Qoray: Dr. Maxamud Maxamed Culusow
