Saddex qarax oo is-miidaamin ah ayaa caawa lagu qaaday garoonka diyaaradaha Ataturk ee magaalada Istanbuul, dalka Turkiga, waxayna is-miidaamiyeyaasha is qarxiyay intii aysan qaraxa geysan rasaas ku fureen dadkii garoonka ku sugnaa.
Dadka dhintay ayaa ilaa hadda tiradoodu gaartay 28, waxaana dhaawac ahaan loo qaaday tobanaan kale, sida uu sheegay guddoomiyaha Gobolka Istanbuul.
Booliska ayaa rasaas ku riday si ay u joojiyaan laba kamida dableyda weerarka soo qaaday ka hor intii aysan gaarin goob koontarool oo ku dhow qeybta dadka soo dega, markaasoo ay is qarxiyeen. Garoonka diyaaradaha Ataturk ayaa ah kan saddexaad ee Yurub oo dhan ugu mashquulka badan.
Duqa magaalada Istanbuul Vasip Sahin ayaa saxafiyiinta us heegay in 28 ruux ay ku dhinteen weerarada isla markaana ay ku dhaawacmeen ku dhowaad 60 kale. Ilo kala duwan ayaa sheegay inay qaraxyada ahaayeen laba qarax, laakiin Duqa Istanbul ayaa ku adkeystay in saddex qarax ay ka dhaceen garoonka.
Turkiga ayaa aaminsan in weerarada ay ka danbeeyeen ururka khilaafada islaamiga ee ISIS. Weerarka ayaa si aad ah ugu eg kii ay Daacish ku qaaday Garoonka diyaaradaha magaalada Brussels oo lagu dilay 16 qof.
Isagoo baarlamaanka Turkiga la hadlayay kadib weerarka Wasiirka Cadaalada Turkiga Bekir Bozdag ayaa sheegay in mid ka mida dableyda weerarka geystay uu rasaas ku furay dadka isagoo watay qori darandoori u dhaca.
UPDATE: Wararkii ugu danbeeyay ee qaraxyadii Turkiga ayaa sheegaya in tirada dhimashada ay gaartay 36, halka dhaawacu sii marayo 140 kale.
SAWIRRO
https://twitter.com/Oguz146/status/747868776956301312
Rueters/Wadani.com
