Munaasabad aad u balaaran si wayn loo soo agaasimay oo loo qabtay ardayda cusub ee dufcadii 21aad ee Jaamacadda Muqdisho ayaa lagu qabtay xarunta ugu wayn Jaamacadda Muqdisho.
Munaasabadan oo ku saabsanayd todobaadka dhaqanka ee Jaamacadda Muqdisho laguna baro ardayda nidaamka Jaamacadda u dagsan, lagana rabo ardayda inta uu ku guda jiro sahanka waxbarashada inuu ilaaliyo nidaamka u dagsan jaamcadda, waxaa kale ee ardayda kusoo bandhigaan todobaadka dhaqanka waxyaabaha ay halabuurka u leeyihiin ee ardayga ku duugan.
Ugu horayn waxaa halkaas ka hadlay guddoomiye kuxigeenka arimaha akaadeemiyada ee Jaamacadda Muqdisho Dr. Cali Daahir Maxamed ayaa soo dhaweeyay ardada cusub, isagoo u sheegay inay nasiib u heleen toban sano kadib inay noqdaan ardaydii ugu horeeyay ee nasiibka u yeelatay inay waxbarashadooda Xarunta Jaamacadda, wuxuuna ardayda u sheegay in siyaasada ay qaadatay Jaamacadda Muqdisho ee ah in ardayda, maamulka jaamacadda iyo shaqaalaha oo dhan oo qof walba uu ku beero geed mirood si meeshan ay u noqoto meel dadka oo dhan ay ku soo hirtaan.
Prof. Maxamed Xuseen Ciise Liibaan oo ah guddoomiye kuxigeenka arimaha xiriirka ee Jaamacadda Muqdisho ayaa ka sheekeeyay heerarkii kala duwanaa iyo horumarkii ay ku talaabsatay Jaamacadda Muqdisho, wuxuuna ardayda kula dardaaramay inay waqtigooda ka faa’idaystaan, waqti badana ay geliyaan waxbarashada, wuxuuna u rajeeyay guul iyo horumar.
Sidoo kale waxaa munaasabadan ka hadlay Ustaad Maxamed Xuseen Cumar oo ah mas’uulka ugu sareeya geeska Afrika ee hay’adda Qadar Charity iyo ganacsade Soomaaliyeed sheekh Daahir Sheekh Axmed oo iyagana u hambalyeeyeen ardada cusub ee ku soo biirtay Jaamacadda Muqdisho, kulana dardaaramay ardayda inay dadaal dheeri ah muujiyaan.
Waxaa isna halkaas ka hadlay guddoomiyaha Jaamacadda Muqdisho Dr. Ibraahim Maxamed Mursal Cali oo u hambalyeeyay ardayda cusub iyo waalidiintooda doorashadii ay soo doorteen Jaamacadda Muqdisho.
“Waxaan ku faraxsanahay 10 sano kadib in xaruntii ugu weynayd ee Jaamacadda Muqdisho aan maanta munaasabadaan todobaadka dhaqanka ee Jaamacadda Muqdisho ku qabanayno”ayuu yiri Guddoomiyaha Jaamacadda
“Jaamacadda Muqdisho waa lagu soo kala horeeyay ee lama kala laha aqoonyahankii dhidibada utaagayna waxay isku dhaarsadeen in Jaamacadda Muqdisho loo sameeyay shacbiga Soomaaliyeed.”
Mar uu ka hadlayay guddoomiyaha Jaamacadda Muqisho waxyaabaha ay gaarka utahay Jaamacadda Muqdisho inay ka mid yihin waxbarasho kusalaysan akhlaakh, karti iyo islaanimmo, imtixaankeeduna uu yahay mid hufan ardaygeedana uu yahay mid la ixtiraamo isna uu ixtiraamo macalimiintiisa iyo maamulkiisa horayna ay usoo saartay dad tayo leh oo bulshada soomaaliyeed wax baddan oo lataaban karo u qabtay.
“Jaamacadda Muqdisho waa jaamacad u taagan inay soo saarto hogaamiye ummadiisa u horseeda wanaag sharaf iyo cisi kana ilaalisa ama ladagaalanta waxyaabaha xunxunka ah ee ay ka mid yihiin qabyaalada iyo miraheeda xun.” sidaasna waxa yiri guddoomiyaha Jaamacadda Muqdisho Dr. Ibraahim Maxamed Mursal.
Ugu dambeyn Guddoomiyaha Jaamacadda Muqdisho Dr. Ibraahim Maxamed Mursal Cali ,ayaa sheegay in Ardayda ay u balan qaadayaan in Jaamacadda Muqdisho ay ugu imaan doonaan cadaalad, akhlaaq iyo waxbarasho tayeysan.
SAWIRRO
