Dowladda Turkiga ayaa ku dhawaaqay inay dib u dhis ku sameyneyso Dekadda magaalada Beirut ee dalka Lubnaan, iyadoo Amiirka dalka Qatar uu ku deeqday lacag gargaar ah.
Madaxweyne ku xigeenka Turkiga Fuat Oktay ayaa shaaciyey kadib kulan uu la qaatay Madaxweynaha Lubnaan Michel Aoun in wadankiisu uu diyaar u yahay in uu gacan ka geysto dib u dhiska dekadda Beirut oo ku burburtay qaraxii weynaa ee dhowaan ka dhacay.
Dekadda Mersin ee Turkiga, ee ku taal badda Mediterranean ayuu sidoo kale sheegay in ay diyaar u tahay in ay Lubnaan ka caawiso adeegyada kastam-ka iyo keydinta shixnadaha waaweyn illaa Dekadda Beirut dib loo dhiso.
Oktay waxa kale oo uu hadalkiisa ku xusay in diyaarada ambalaasyada ah ee Turkigu ay dadka dhaawacyada ah u qaadi karaan Turkiga si halkaasi loogu soo daweeyo. Mas’uuliyiinta Turkiga ayaa u diray Lubnaan koox caafimaad, saanad iyo sidoo kale koox howlaha baadi goobka iyo badbaadinta gacan ka geysata.
Dhinaca kale Aiirka Qatar Tamim Bin Hamad Althani ayaa 50 Milyan oo Riyaalka Qatar ugu deeqay dalka Lubnaan oo u dhow 14 milyan oo doollar si loogu gargaaro dhibaatada ka dhalatay qaraxii magaalada Beirut.
Dowladda Qatar ayaa dalka Lubnaan u dirtay koox gurmadka degdegga ah iyo diyaarado sida mucaawino raashin, Qalab iyo Daawooyin sida.
