Ugaaska Beesha Cawlyahan Ugaas Xuseen Ugaas Maxamuud Ugaas Qorane ayaa si weyn uga hor yimid qorshaha Axmed Madoobe ku doonayo in dib loogu doorto ee qaabka ay u socoto Doorashada maamulkaasi.
Isagoo ka hadlay shir au waxgaradka beeshaasi Kismaayo ku yeesheen ayuu ku caddeeyay in Axmed Madoobe aanu xoog ku qabsan karin Jubbaland, isla markaana uu joojiyo inuu qofkii uu doonayo isagu soo xusho, wuxuuna sheegay inuu Ugaaskiisa yahay, dadka uu isaga ugu xigo, balse uu runta u sheegayo.
“Jubbaland Soomaali waa u wada dhimatay, nin aan wiilkiisa ku maqneyn ma jirto.. Waa dad wax isku darsaday oo gobollo iyo degmooyin kala dega.. Wixii aan isku darsanay cid gaara ma sheegan karto.. Ninka oranaya Jubbaland aniga ayey igu kooban tahay waa khaldan tahay.. Axmed Maxamed Islaam dad anigaa ugu xigta,, ugaaskiisii ayaan ahay… Axmadow cidla ayaad jibaaxeysaa, madaxweyne waxaad ku noqon kartaa reer Jubbaland oo ku doorta..” ayuu yiri Ugaaska oo kulanka uu ka hadlayey uu garab fadhiyey musharaxa C/naasir Seeraar.
“Awood nin wax ku qabsan kara ma jirto… Axmedow mas’uuliyad iyo madaxweyne waxaad ku noqon kartaa reer Jubbaland oo ku doorta.. dadka tafaraaruqa iyo kala qeybinta ka daa.., Dadkan dad xabbad lagu leyn karo maaha.. bal inta ay tiro la eg yihiin fiirii,.. dadka ku nool Jubbaland argagixisada ha laga daayo .. dhoolatuska halaga daayo..” ayuu si kulul u yiri Ugaaska oo si weyn ula taliyey Axmed Madoobe.
Arrintan ayaa ku soo beegantay iyadoo Guddiga Doorashada Jubbaland la sheegay in maanta loo gudbinayo Liiska xildhibaannada jubbaland.
