Faahfaahin dheeraad ah ayaa laga helayaa weerar duqeyn ah iyo dagaal toos ah oo ay Alsahbaab ku qaadeen magaalada Marko ee xarunta gobolka Shabeellaha Hoose oo dhowaan ay qabsadeen ciidamo ka tirsan milateriga Soomaaliya oo uu hoggaaminayo Jen. C/llaahi Cali Caanood.
Weerarka Alshabaab ayaa dhacay xilli danbe xalay isagoo socday ilaa saaka, waxayna dagaalamayaasha Alshabaab weerarka ka bilaabeen degaanka Jilib-Marko oo ay labada dhinac ku dagaalameen, iyadoo kadibna uu dagaalku gaaray gudaha magaalada.
Dadka magaalada Marko ayaa sheegay in dagaalka oo ahaa mid xoog leh ay labada dhinac is weydaarsanayeen Madaafiic xoog leh oo ay bilaabeen kooxda Alshabab, waxayna dagaalladu ka dhaceen Kawaanka Malaayga iyo Saldhiga Booliska magaalada Marka.
Wararkii ugu danbeeyay ayaa sheegaya in ciidamada AMISOM ee degan duleedka magaalada ay madaafiic ugu jawaabeen Alshabaab, iyadoo qasaare kala duwan uu dhaliyay dagaalka cusub ee ka dhacay magaalada Marko.
Saraakiil ka tirsan militariga Soomaaliya oo ku sugan halka lagu dagaallamay ayaa warbaahinta u sheegay in Al-shabaab dib looga riixay magaalada Marka,islamarkaana dagaal-yahanno looga dilay halka kuwa kalena nolosha looga qabtay,sida ay hadalka u dhigeen.
Ma jiro war kasoo baxay kooxda Alshbaab iyo ilo madax bannaan oo xaqiijinaya qasaaraha ka dhashay dagaalkaasi.
