Warar is khilaafsan ayaa kasoo baxaya dagaal qaraar oo ciidamada Itoobiyaanka iyo Kooxda Alshabaab ku dhex maray saldhig ay Itoobiyaanka ku leeyihiin degaanka Halgan ee duleedka Magaalada Beledweyne.
Guddoomiyaha degaanka Halgan Guhaad Cabdi Warsame ayaa sheegay in maleeshiyada Alshabab laga dilay uu gaarayo 200. “95 maleeshiyo ayaan tiriyay markaas kadib ayaan iska joojiyay meydadka meesha yaala waa ka badan yihiin 200” ayuu yiri Guhaad oo intaas ku daray in dadka Shacanka ah qasaaraha soo gaaray uu yahay qof dumar oo dhimasho ah iyo 9 dhaawac ah.
Guddoomiyaha degaanka Halgan ayaa sheegay in dagaalku socday 50 daqiiqo oo qasaare ba’an loogu geystay Alshabaab, isla markaana loo laayay sida beer Yaambo la geliyay oo kale sida uu yiri, wuxuuna intaas ku daray in dhaawacyadii Alshabaab la dhameystirayo.
War kasoo baxay Midowga Afrika ayaa lagu sheegay dagaalka Halgan ay ku dileen 105 dagaalame oo Alshabaab ah ayna qasaare ba’an huwiyeen kooxda argagixisada Alshabaab.
Dhinaca kale Dadka degaanka ayaa sheegay inaan la ogaan karin qasaaraha gaaray Alshabaab, basle ay arkeen ilaa 25 meyd ah oo ka tirsan Alshabaab.
Alshabaab ayaa iyaguna sheegtay inay dileen ilaa 60 askari oo Itoobiyaan ah, dhinacodoona ay ka dhinteen 16 dagaalame.
Ilo kale ayaa qasaaraha Alshabaab ka dhigaya inuu ka badan yahay 2oo, sida uu shaaciyay wasiirka amniga gudaha Soomaaliya C/risaaq Cumar Maxamed oo ku dooday in Alshabaab laga dilay 240 maleeshiyo, tani oo haddii ay dhab noqoto ah qasaarihii ugu ba’naa ee Alshabaab soo gaaray muddooyinkan.
Wadani.com
