Xaaladda magaalada Beledxaawo ee Gobolka Gedo ayaa degan saaka, kadib dagaalkii shalay ka dhacay oo ciidamada dowladda Federaalka Soomaaliya ay kula wareegeen guud ahaan magaalada iyo Xuduudka, kana saareen ciidamadii taabacsanaa Maamulka Jubbaland ee uu hoggaaminayey Wasiirka Amniga C/rashiid Janan.
Guud ahaan magaalada iyo xuduudka Somalia iyo Kenya waxaa gacanta ku hayaan ciidanka Dowladda Federaalka, iyadoo uu hadda soo baxayo qasaaraha ka dhashay dagaalkii shalay oo ahaa mid culus oo saameyn ku yeeshay Magaalada Mandheera ee Kenya.
Ciidamadii taabacsanaa Cabdirashiid Janan ee ka firxaday dagaalka ayaa waxay u gudbeen gudaha Kenya, waxayna warbaahinta Kenya kashiftay Xog ku saabsan dagaalkii shalay iyadoo soo bandhigtay sawirrada ciidamadaasi oo loo galbinayo xero ay ciidamada Kenya leeyihiin iyo saldhigga Booliska Mandheera.
Isbitaalka Mandhera ayaa la geeyay 10 qof oo dhaawac oo midkood ku dhintay isbitaalka, iyadoo 6 ka mida ay yahaayeen shacab iyo afar askari, sida u usheegay dhaqtarka ka howlgalla Isbitaalka Cabdullaahi Xassan oo la hadlay warbaahinta Kenya.
Warbaahinta Kenya ayaa baahisay Gaari kuwa dagaalka ah oo ay saaran yihiin ciidamada C/rashiid Janan, kaasoo dhex maraya magaalada Mandheera, iyo ciidamo kale oo kuwa Kenyaanka ah ay wadaan, iyadoo Wargeyska Daily Nation uu sheegay in markii ciidamadii dowladda Soomaaliya ay Gudaha Kenya soo galaan lagu amray ciidamadii Jubbaland inay ka baxaan dagaalka.
Dhinaca kale wuxuu Wargeysku sheegay in milateriga dalka Kenya ay saddex kamid ah ciidamadii Jubaland ee dhaawacmay ay geeyeen xerada ay ku leeyihiin Mandheera.
Wasiirka warfaafinta ee Jubbaland Injineer Cabdi Xuseen Sheekh Maxamed ayaa eedeyn kulul u jeediyey Dowladda Soomaaliya. “Dagaalkan waa mid ay Dowladda Federaalka ugu talagashay inuu shacabka ku qaxo, sidii dhacday 1991-kii iyo 1992-kii. Cid walba way fileysay in markii ay kasoo jeestaan Galmudug ay ku xijin doonaan Jubbaland”, ayuu yiri.
