Waxaa maanta taliye cusub loo magacaabay ciidamada xoogga dalka Soomaaliyeed kadib markii uu is casilay taliyihii hore Jen. Axmed Jimcaale Geedi (Cirfiid).
Taliyaha cusub ee ciidamada xoogga ayaa loo magacaabay Sareeye Gaas C/weli Jaamac Xuseen (Gorod), waxaana magacaabidiisa ansixiyay Golaha Wasiirada xukuumadda Soomaaliya oo shirkoodii maanta uu hor keenay wasiiru dowlaha Gaashaandhigga.
Taliyaha cusub ee xoogga wuxuu ka mid ahaa musharixiintii xilka madaxweynaha ee Galmudug markii maamulkaasi la dhisay,waxaana dadka xilkan ugu hambalyeeyay ugu horeeyay madaxweynihii hore ee Galmudug C/kariin Xuseen Guuleed.
Taliyaha cusub oo ay isku beel yihiin taliyihii hore ee ciidamada xoogga dalka ayaa ka mid ahaa ciidamada Cirka Soomaaliyeed, isagoo ka gaaray heer Duuliye diyaaradeed ah, Dhinaca kale wuxuu Wasiir ka soo noqday dowladii KMG ahayd ee madaxweyne C/qaasim Salaad, isagoo markaa ahaa Wasiirka Dekedaha xukuumadii Carte.
TAARIIKHDIISA
Jeneral Cabdiweli Jaamac Gorod waxa uu ku dhashay magaaladda Muqdisho sanadkii 1950-kii. Iskuulka hoose dhexe waxa uu ka dhigtay dugsiga Macalin Jaamac, Dugsiga sarena waxa uu ka gallay iskuulka farsamada gacanta ee magaalada Muqdisho.
General Gorod waxa uu ciidanka qortay 1966-dii. Dalka Ruushka ayaa tababar loogu diray 1975-tii waxuuna waxbarashada luuqada ruushka ka bilaabay magaalada Furanza ee dalkii la oran jiray Midowga Sofyeeti. 1977-dii waxauu duulimaadka diyaaradaha ka bartay Akademiyada Karasnadaar ee dalka Ruushka .
Dalka ayuu dib ugu soo laabtay isagoo xiddigle ah. Waxaana la geeyey xerada ciidanka cirka ee Balidoogle. 1980-kii waxa uu qaaday xidigii labaad waxaana loo badalay xeradii ciidanka cirka ee duleedka Kismaayo halkaasoo uu ku bartay duulimaadyada diyaaradaha xamuulka ciidanka.
1984-tii waxa uu qaatay darajada sadax xidigle waxaana loo badalay magaaladda Hargeysa. Waxuuna berigaasi duulin jiray diyaaradaha ciidanka ee loo yaqaano Biyaajo 160 oo Talyaaniga lagu farsameeyo.
1988-dii waxaa lagu soo celiyey xerada ciidanka cirka ee Kismaayo. Sadax bilood ka dibna waxaa loo badalay Muqdisho oo waxuu cilmi kororsi luuqadaha ah ka bilaabay machadkii la oran jiray OMC oo dowladda Maraykanka ay gacanta ku haysay. Waxuu noqday gaashaanle sare. Isagoo gaashaanle sare ah ayayna burburtay dowladii dhexe.
Jeneral Gorod dowladii Carte ee Cabdiqaasim Salaad ayuu ka noqday wasiirka dekadaha. Labo sano ayuuna hayay xilkaasi. Jeneraalka waxuu dhalay sided caruur. Waxuuna degan yahay magaaladda London.
