Wasaaradda Gaashaandhigga Mareykanka ayaa War kasoo saaray duqeyntii horreysay muddo lix bilood ah oo ahayd weerar duqeyn lagu qaaday kooxda Al-shabaab, agagaarka degaanka Bacaadweyn ee Gobolka Mudug.
Pentagon-ka Mareykanka ayaa sheegay in duqeyntay ay aheyd mid uu ku caawinayay ciidamada kumaandoosta Soomaaliya oo weerarro kala kulmayay argagixisada Al-shabaab, kadib dagaallo maalmihii ugu danbeeyay ka socday Gobolka Mudug.
Waaxda Gaashaandhigga Mareykanka ee Pentagon-ka ayaa xalay xaqiijisay inay ka dambeeyeen hal weerar oo ka dhacay meel u dhow magaalada Gaalkacyo, oo qiyaastii 580 Kilo Mitir dhanka waqooyi ka xigta magaalada Caasimadda ee Muqdisho, waxaana duqeybtan markii hore xaqiijiiyay saraakiisha Soomaaliya.
Sarkaal ka tirsan Wasaaradda Gaashandhigga Mareykanka ayaa sheegay in duqeyntaas fulinteeda loo cuskaday shirciyo hore u jiray, si loo difaaco xoogagga Mareykanka xulifada la ah, waxaana la fuliyay duqeyntaas iyada oo aysan jirin ciidan Mareykan ah oo ku sugan dhulka.
“Ciidamada Mareykanku waxay hayeen howlgal talo bixin iyo caawimaad ah, kuwaas oo lagu taageerayay ciidanka Soomaaliya… Ma jirin ciidamo Mareykan ah oo la socday ciidamada Soomaaliya intii uu socday howlgalkan” ayuu yiri afhayeennada waaxda Gaashaandhigga Mareykanka Cindi King.
Taliska ciidamada Soomaaliya iyo wasaaradda warfaafinta ayaa shalay shaaciyey duqeyntan, iyagoo sheegin cidda qaaday, balse waxaa warka Taliska Xoogga dalka lagu sheegay in weerarka lagu dilay ilaa 50 ka mida dagaalamayaasha Alshabaab, iyadoo weli aan si madax bannaan loo xaqiijin.
Weerarkii cirka ee Talaadadii lala beegsaday Al-Shabaab ayaa ah duqeyntii ugu horreysay ee noocan oo kale ah muddo lix bilood ah, waana tii ugu horreysay oo la qaado tan iyo markii uu xafiiska la wareegay madaxweynaha Mareykanka Joe Biden.
Saraakiisha Mareykanka ayaa ka gaabsaday inay faahfaahin ka bixiyaan sababta duqeyntan loo oggolaaday ama in Taliska Mareykanka ee Afrika uu bilaabi doono inuu sameeyo olole aad u xooggan oo dhanka cirka ah oo lagu taageerayo ciidamada Soomaaliya, sida kuwa Mareykanka uu Soomaaliya ka geystay sanadihii la soo dhaafay.
