Wasiirkii hore ee Howlaha Guud ee xukuumadda Soomaaliya Eng. Saalax Sheekh Cusmaan ayaa sheegay inuu ka badbaaday isku day oo loogu qorsheeyay magaalada Baydhaba.
Wasiira Saalax ayaa ku eedeeyay inuu dilkiisa uu abaabulay wasiirka Amniga Maamulka K/Galbeed, ahna kusimaha madaxweynaha maamulkaasi Xuseen Xasan Eelaay, wuxuuna ku dooday in dilkiisa lagu soo beegay xilli uu mucaawino ka qeybin lahaa magaalada.
Qoraal uu baraha bulshada soo dhigay Wasiir Saalax ayuu arrintan ku sheegay, inkastoo aanu soo bandhigay wax caddeymo, wuxuuse caddeeyay inuu dacwad ku soo oogi doono wasiirka.
HOOS KA AKHRISO FARRIINTA WASIIRKA
ISKU DAY DIL OO AAN KA BAD BAADAY!
Maalmihii la soo dhaafay waxaa hawlo shaqo ku joogay Magaalada Baydhabo, ujeedada aan halkaan u imid ayaa ku saabsaneyd sidii aan ugu adeegi lahaa shacbigayga K/Galbeed, saacadihii la soo dhaafay waxaa Baydhabo iyo hareeraheeda ka da’ayay Roobab mahiigaan ah, damiir ahaan waxaan goostay sidii aan Gargaar ugu fidin lahaa dadka ay waxyeelada ka soo gaartey Roobabkaasi. Kaalmadii aan ugu tala galay inaan gaarsiiyo shacbiga reer Baydhabo waxaa maanta iga hor istaagay Wasiirka Amniga oo haatan ah ku magaacaban ku-simaha Madaxweynaha K/Galbeed Xasan Eelaay, ninkaasi ayaa ciidamo daacad u ah waxa uu ku amaray inay i Khaarijiyaan, Dilkayga ayaa la qorsheeyay in lagu soo beego waqtiga aan qeybinayo kaalmada aan u sido dadka masaakiinta ah. Xasan Eelaay ayaa askartiisa farey inay dharka Ciidamada iska dhigaan marka ay duulaanka sameynayaan si loo yiraahdo Wasiir Saalax Sheikh Cusmaan waxaa Dilay Maleeshiyaad ka tirsan Al-Shabaab, falkaan guracan ayaa ah mid ka soo horjeedo Dastuurka iyo Xuquuq Insaanka, Anigoo ka xun arintaasi ayaa ummadda Soomaliyeed waxaan u caddeynayaa inaan Sharciga iyo Maxkamadaha la tiigsan doono. Dulmi aan geed loogu soo ganban ayuu igula kacay Xasan Eelaay, waxaa nasiib daro ah inuu Aniga kaligey i soo bar tilmaameedsado, Siyaasiyiin badan oo aan la dhacsaneyn Maamulka K/Galbeed ayaa ku sugan Baydhabo, siyaasiyiintaasi ayaa looga baqayaa Qabiiladooda oo ku Hubaysan Magaalada Gudaheeda. Kaalmadii uu ninkaasi hor istaagay ayaa mar kale haddii uu Alle idmo waxaa Berri la gaarsiin doona shacbigii aan ugu talagalay, marnaba ma dhaceyso inay baqdin galiso falkaasi Waxashnimada ah, sharaf ayay ii tahay inaan u Geeriyoodo Anigoo u adeegayo dadkayga dhibaateysan, adduunka aan maanta ku nool nahay waa ka dhamaadey Kali Talisnimo, suurtagalna ma aha in shacabka K/Galbeed lagu dul hayo Nidaam aaney dooneynin, Isbadal waa inuu dhacaa si horumar loo gaarsiiyo ummadda ku nool deeganada K/Galbeed. MAHADSANIDIIN
