Iyadoo maamul Goboleedka Puntland uu dhowaan sheegay in qaar ka mida Golaha Wasiirada iyo Baarlamaanka laga helay cudurka Covid-19 ayaa wasiirkii ugu horeeyay uu shaacyey inuu cudurkaasi haleelay.
Wasiirka Ganacsiga iyo Warshadaha Puntland Cabdullaahi Cabdi Xersi ayaa shaaciyay inuu ku dhacay Cudurka Covid-19, isla markaana uu xilligan aad u wanaagsan yahay oo uu ka soo kabtay Qandho iyo xanuun daran uu dareemay maalmihii la soo dhaafay.
“Akhyaarta sharafta waan idin salmay. Waxaa igu dhacay Covid19. waana ladanahay hadda. Qandho iyo wareer baa iigu darnaa maamahii lasoo dhaafay. Aad baa u fiicanahay hadda” ayuu yiri Wasiirka oo qoraal soo dhigay bartiisa Facebook
Wasiirku wuxuu intaas ku daray inuu Gurigiisa isku karantiilay markii laga helay cudurka Covid-19, isagoo aan cidna is arag, isagoo guriga joogi doona muddo 14 Maalmood ah.
HOOS KA AKHRISO FARRIINTA WASIIRKA
ASC.. Akhyaarta sharafta waan idin salAmay. Waxaa igu dhacay Covid19. waana ladanahay hadda. Qandho iyo wareer baa iigu darnaa maamahii lasoo dhaafay. Aad baa u fiicanahay hadda.waxaan isku xanibay guriga cidna isma aragano, meel umma baxo.
Si anan dadkale u qaadsin, Waxaan Xanibaadda ahaan doonaa muddo 14 beri ah gurigaan joogi doonaa Insha alla.waxaan soo jeedin lahaa in qofkii xanuunsada uusan gurigiisa dhaafin. Hadii qofkaas Covid19 ku dhacay caafimaad dareemayo, waxaa jira dad waayeel ah iyo dad xanuuno kale qabay oo aan u adkaysan karin Covi19.
Dadkaas jiro ha u geeynin Gurigaaga joog. Qofkii callamadaha isku arka, ha is baaro. Qofkii Xanuunka laga helo, gurigiisa hajoogo inta markale laga xaqii jinaayo in cudurka ka baxay. Talooyinka bahda caafimaadka hala qaato.Waxaan idiin rajaynayaa caafimaad iyo bad qab.
Qadarin Abdullahi Abdi
