Wasiir Al-cadaalla oo caddeeyay in Dhagar ka weyn inta la maleyn karo loo maleegayo Soomaaliya si aysan Doorashada Nabad ugu dhammaan
Wasiir ku xigeenka warfaafinta xukuumada Soomaaliya Cabdiraxmaan Yuusuf Cumar Alcaddaala ayaa markii ugu horeysay ka hadlay halista uu dalku wajahayo xilligan iyo caqabbadaha waaweyn ee ku wareegsan Ra’iisal wasaare Maxamed Xuseen Rooble.
Wasiir Al-caddaala oo ka hadlay dood Twitter Space ka dhacday oo xalay ay ka qeyb galeen siyaasiyiin iyo aqoonyahanno ayaa sheegay in arrimo badan oo mudnaa in wax laga qabto ama tallaabo laga qabtay uu Ra’isal wasaaraha uga wareegayo xaaladda dalka iyo waxa ka dhalan kara, isla markaana aysan wax kasta sheegi karin si aan umadda loo niyad jebin.
Arrinta ugu weyn ee uu soo hadal qaaday Wasiir ku xigeenka Warfaafinta, ayaa ah in xafiiska ugu sareeya dalka ‘Madaxtooyada’ miiska lasoo saaray in talada dalka lagu wareejiyo Alshabaab, ayna jiraan xoogag gudaha iyo dibadda ah oo kala shaqeynaya.
“Xaqiiqo badan oo munaasib ahayn in la sheego ayaa jira.. Arrin ka mida xaaladaha miiska saaran waa in Soomaaliya ay ka dhacdo xaalad ka mida sida ka dhacday Afghaistan oo ah in talada dalka lagu wareejiyo Alshabaab; Arintaasina kaliya kama socoto Dadka Soomaalida, ee dibada ayaa laga wadaa” ayuu yiri Wasiir Al-cadaalla oo sheegay in ujeedka la doonayo in af iyo gaca o hortaagan yahay Doorashada ay taas tahay.
wuxuu intaas raaciyey in Qorshaha la doonayo in argixisada Alshabaab lagu wareejiyo dowladnimada lagu soo qaaday heerka ugu sareeya dowladda oo saaran miiska, laguna soo hadal qaaday dowladda Soomaaliya, taasina ay tahay dariiqa loo leexiyo dowladnimada Soomaaliya.
Al-cadaalla oo dhinaca kale ka hadlay sababta loo hakiyey afarta kursi oo uu ka mid yahay kursiga uu kusoo baxay Agaasimihii hore ee NISA Fahad Yaasiin ayaa sheegay in kuraastaasi si sharci darro loo qabtay, iyadoo ay joojiyeen guddiga FEIT ee aysan jirin sabab shaqsi ah.
“Haddii inta la dhinac maro guddiga FEIT, SEIT iyo guddiga xallinta khilaafaadka oo Baarlamaanka lagu gelayo Qori, hadde annagu maxaan bannaanka u joognaa?, idinku maxaad bannaanka u joogtaan?” ayuu yiri wasiir Al-caddaala oo ka fal celiyey inay dhici karto in awood loo adeegsado khilaafka kuraastaasi.
