Wasiirka Amniga Gudaha Xukuumadda Soomaaliya Maxamed Abuukar Isloow (Ducaale), ayaa si kulul uga hadlay howlgal dhimasho iyo dhaawac sababay oo Ciidamada Booliska shalay ku aadeen xaafad ka tirsan degmada Wadajir ee Gobolka Banaadir.
Howlgalkan ayaa waxaa hogaaminayey Madaxa Amniga Gobolka Banaadir Maxamed Tuulax, Taliyaha booliska Gobolka Banaadir Saadaq Joon iyo Qaasim Rooble oo ah afhayeenka Booliska, waxaana lagu burburiyey dhismayaal iyadoo dagaal dhex maray ciidamada iyo dad shacab ah.
Wasiirka Amniga ayaa maanta la kulmay qaar kamid ah ehelada dadkii dhibaatada kasoo gaaray howlgalkaasi oo looga burburiyey goobo ganacsi iyo dhismayaal dad ay daganaayeen, wuxuuna caddeeyay inuusan raali ka eheyn wixii ka dhacay Xaafada Nasteexo ee degmada Wadajir.
Ciidamada Booliska iyo Dabley hubeysan oo ahaa dadkii lahaa goobaha la burbirnayey ayaa dagaal mudo kooban socday dhex maray, waxaana ku dhintay laba qof oo labada dhinac kala ah iyo dhaawaca dadka kale oo u badan dadka degaanka, iyadoo dhaawacooda ay xalay Ciidamada Booliska kala baxeen Isbitaalka Mediina.
“Caddeymo ayaan raadin doonnaa, Gaal iyo Muslimba waxey qabaan qofka dhaawaca ah in la daaweeyo, Shabaab hadduu yahay xitaa, Tallaabo ayaan arirntaasi ka qaadi doonaa, wixii dhacayna waa la dabageli doonaa” ayuu yiri Wasiir Islow oo la hadlayay ehelada waxyeeladu soo gaartay.
Dhinaca kale xildhibaan Samiiro Xasan Cabdulle, oo matasha dadka dhibtu gaaray, ayaa sheegtay ineysan ka daba hari doonin dadkii dhibta geystay, Shacabka ayey ugu laab qaboojisay iney ogaadaan inaan marnaba dhici doonin in la dulmiyo.
