Wasiirka Amniga Xukuumadda Federaalka Xasan Xundubey Jimcaale ayaa sheegay in wixii maanta ka dhacay magaalada Muqdisho ay ahaayeen dad wax-ma-garad ah oo ay soo abaabuleen dad gaaraadkoodu liito oo Hoteelo jiifa.
Wasiir Xundubey oo qeyb ka ahaa shir jaraa’id oo qabteen qar ka mida wasiirada xukuumadda kadib xaaladii Muqdisho ee maanta ayaa si gaara uga hadlay bannaanbaxyadii ka dhacay Muqdisho, wuxuuna sheegay inuusan ahayn Mudaaharaad Nabadeed oo dadkii ka qeyb galay ay hub wateen.
“Wixii maanta dhacay waxay ahaayeen falal amniga looga horjeedo oo wax-ma-garad la soo abaabulay oo iyagoo weliba qoryo wata jidadka lasoo tubay.. taa macnaheedu waxa waaye in Ammaanka lagu soo duulay iyo in colaad la buray, in shaqadii Amniga la dhantaalay, wax alla wixii ka dhacay oo dhaawac iyo dhimasho leh waxaa mas’uuliyadeeda iska leh oo arrintaas dusha saaranaya dadka soo abaabulay oo laftoody ah kuwo garaadkoodu liito” ayuu yiri Wasiirka Amniga.
Wuxuu wasiirku ka digay in falal noocaasi ah ay dib soo noqdaan, wuxuuna sheegay in dadkii ka danbeeyay si sharci ah gacanta loo qabto oo laga hortago.
DAAWO
