Wasiirka Arrimaha dibadda Xukuumadda Xilgaarsiinta Soomaaliya Maxamed C/risaaq Maxamuud ayaa ku eedeeyay in qaar ka mida siyaasiyiinta Mucaaradka ee magaalada Muqdisho ay abaabuleen maleeshiyaad khatar ah.
Wasiirka oo ka hadlayey xaalada Muqdisho ayaa sheegay in qaar ka mida Siyaasiyiinta mucaaradka ay ka danbeeyeen maleeshiyooyinka soo galay caasimadda. “Qaar ka mid ah siyaasiyiinta mucaaradka ee Muqdisho ayaa abaabulay maleeshiyo beeleed, kuwaas oo khatar ku ah. Maleeshiyaadkaasi waxay ku sugan yihiin Muqdisho. Waxay u baahan yihiin inay arrintaas laga joogsado” ayuu yiri wasiirka xilka sii haya oo wareysigan bixiyey intii aanan ciidamadaasi laga saarin Caasimadda.
Wuxuu sheegay in Soomaaliya ku tiirsan tahay deeq-bixiyeyaasha, iyadoo dakhliga ka soo xarooda dalka uu kaafin karo kaliya wax ka yar kala bar miisaaniyaddeeda sanadlaha ah. “Dowladdu waxay heshay wax ka yar kala bar 100 milyan oo Yuuro ($ 120 milyan) oo Midowga Yurub uu ku yaboohay saddex sano oo barnaamij taageero miisaaniyadeed ah oo dhammaanaya sannadkan” ayuu yiri oo u warramay Bloomberg.
Wuxuu sheegay in Dowladu ka digtay inay jirto qatar ah in qalalaasaha sii kordho, haddii dhibaatadda Maaliyadeed ee taagaan, iyadoo aysan awoodin inay daboosho mushaharka shaqaalaha iyo ciidamada.
“Haddii dowladdu aysan awoodin inay sii waddo bixinta mushaaraadka shaqaalaha rayidka ah, gaar ahaanna ciidamada amniga, taasi waxay abuuri kartaa dhaawac weyn, Waxaan ku jirnaa wadahadal aan ku doonayno in lacagtaas lagu sii daayo” ayuu yiri Wasiirka Arrimaha dibadda xukuumadda xilgaarsiinta Soomaaliya.
Soomaaliya waxay dadajin doontaa doorashooyinka si loo xakameeyo xasillooni darrada iyo in lagu qanciyo deeq-bixiyeyaasha si loo sii daayo lacagaha loo baahan yahay in lagu bixiyo ciidamada amniga ee qaranka iyo shaqaalaha kale ee dawladda, sida uu ayuu yiri Wasiirka Arrimaha Dibadda Maxamed Cabdirisaaq.
