Wasiirka Ganacsiga xukuumadda Federaalka Jibril C/rashiid Xaaji ayaa dood weyn ka dhex abuuray Baraha Bulshada, kadib markii xalay la baahiyay kulan su’aalo is-weydiin ah oo uu la yeeshay Guddiga Baarlamaanka ee Ganacsiga.
Wasiirka ayaa si kulul ugu jawaabay Xildhibaan C/weli Maxamed oo ku eedeeyay inay shaqaale ay qaab qabiil uga eryeen Wasaaradda, siiba Hay’adda Tayo-dhowrka, isla markaana uu ku bedelay kuwo ku heyb ah iyo xubno loo magacaabay Safaaradaha Dibadda.
Wasiirka Ganacsiga Jibriil Cabdirashiid ayaa si aan ganbasho lahayn u sheegay in fursadaha shaqo uu siinayo reerkiisa iyo qaraabadiisa ugu dhow, sidaasina ay yeelaan madaxda iyo xildhibananada su’aalaha weydiinaya.
Hadalka Wasiirka ayaa Dood culus ka dhex dhaliyay xildhibaannada, siyaasiyiinta iyo madaxda dowladda, waxaan si weyn loogu qaada-dhigay Baraha bulshada, wuxuuna mar kale maanta qabtay shir jaraa’id isagoo faahfaahin cusub bixiyay markii uu culeys uga yimid Ra’iisal wasaaraha.
“Ma jiro hal qof oo reerkeyga ah oo aan Wasaaradda ka shaqaaleysiiyay, wasaaradda kuma shaqeyso qaab qabiil waa Wasaarad Soomaaliyeed, waxaan ka cudur daaranayaa sida xun ee loo fahmay warkeygii shalay” ayuu yiri wasiirka, isagoo caddeeyay qaabka lagu shaqaaleeyay 10 qof oo Hay’adda Tayo-dhowrka ay qaadatay iyo 10 kale oo la eryay.
Wasiirka Ganacsiga ayaa caddeeyay in 10-ka shaqaale ee laga ruqseeyay Hay’adda Tayo-dhowrka ay ku timid, markii loo baahday dad ku shaqeeya sheybaar, wuxuuna sii raaciyay in xiliga la qaatay aanu joogin, balse qaabka lagu shaqeeeyay ay sax ahayd.
