Wasiiro iyo xildhibaanno kasoo jeeda Beesha Hawiye ayaa maanta gaaray magaalada Baydhaba iyadoo madaxweynaha maamulkaasi kala hadlaya cabasho ay beeshu ka qabto xildhibaannada laga siiyey maamulka K/Galbeed.
Wafdiga waxaa hogaaminayo Wasiirka Amniga xukuumadda Soomaaliya Maxamed Abuukar Islow, waxaana ka mida Wasiir ku xigeenka Dekedaha iyo Gaadiidka Badda Cismaan Maxamed Daallo, Xildhibaan iyo Senataro ka tirsan labada aqal, iyagoo farriin ay ka sidaan Xildhibaanada Beesha gaarsiiyey Madaxweynaha K/Galbeed C/casiis Xasan Maxamed (Lafta-gareen).
“Waxaaa noo socda shirkii waxaana u mahad celinayaa Madaxweynaha KG oo si sharaf leh noosoo dhoweeyey waxaana rajeynayaa inuu Guul kusoo dhamaado shirka nooga socda Magaalada Baydhabo..” ayuu yiri Wasiir ku xigeenka Dekadaha xukuumada Soomaaliya Cusmaan Daallo oo qoraal soo diray.
Xubnaha maanta tegay magaalada Baydhaba ayaa ka danbeeyay shir magaalada Muqdisho ku dhex maray xildhibaannada labada aqal iyo wasiirada Beesha Hawiye, kaasoo looga hadlay qaabka loo qeybiyey Xildhibaanada Baarlamaanka labaad ee K/Galbeed, iyagoo sheegay inay xuquuq ugu maqan tahay.
