Wiil 6 sano jir ah oo u dhashay dalka Kenya ayaa la xaqiijiyey inuu u geeriyooday cudurka Covid-19, iyadoo markii danbe la ogaaday inuu cudurka Coronavirus siday.
Wiilkan ayaa oo kii ugu da’da yaraa ee Afrika ugu dhintay cudurka ayaa la dhigay Kenyatta National Hospital (KNH), waxaana laga cabsi qabaa hadda inuu cudurka qaadsiiyey tobanaan qof oo ay ku jiraan dhaqaatiir iyo kaaliyeyaal caafimaad.
Qoyskiisa ayaa gaari Bas ah lasoo raacay, waxaana markii la geeyay isbitaalka loola macaamilay sidii qof caadi ah, iyadoo la rumeysanaa inuusan caruurta ku dhicin ama u badneyn Coronavirus, taasoo keenay in dhaqaatiirka iyo kaalyeyaasha caafimaad ay la tacaalaan xaaladda wiilkan iyadoo aan xiran qalab ka ilaalin kara coronavirus-ka.
Warbaahinta Kenya ayaa sheegtay in ilaa 50 shaqaale caafimaad oo kala duwan lagu amray ina is karaantiilaan iyadoo laga cabsi qabo inay wiilkaasi ka qaadeen cudurka, waxaana sidoo kale loo sheegay inay guryahooda joogaan qoyska iyo dadkii la xiriirka la yeeshay wiilkaasi oo aan magaciisa la shaacin.
Wiilkan ayaa muddo laba maalmood ah ku sugnaa Qeybta caruurta ee isbitaalka Kenyatta ee magaalada Nairobi, iyadoo markaas kadib baaritaan Coronavirus ah loo diray, iyadoo lagu arkay calaamadaha cudurka, kadibna waxaana la helay natiijadii oo ahayd inuu qabo cudurka Covid-19 isla maalintii uu geeriyooday.
