Waxaa magaalada Kismaayo maanta ka dhaceysa caleemo saarka Madaxweynaha Jubbaland ee doorashadiisa muranka badan dhalisay Axmed Maxamed Islaam, kadib markii ay marar badan dib u dhacday.
Axmed Madoobe oo markii saddexaad xilka dib loo doortay 22-kii Bishii Ogost ayaa dowladda Somalia ay doorashadiiisa ku tilmaantay sharci darro, waxayna golaha wasiiirada xukuumadda Soomaaliya qaraar ay soo saareen ku sheegeen inaysan aqoonsaneyn doorashadaasi, iyadoo markaas kadib xayiraad la saaray diyaaradaha tegaya magaalada Kismaayo.
50 maalmood kadib waxaa magaalada Kismaayo maanta ku sugan Madaxweynayaashii hore ee Soomaaliya, madaxweynaha maamul Goboleedka Puntland, siyaasiyiinta mucaaradka iyo iyo xubno ka tirsan labada Gole oo si weyn uga horjeeda Hoggaanka dowladda Soomaaliya, waxayna taageerayaan Axmed Madoobe oo dhinaca kale taageero ka heysa dowladda Kenya.
Munaasabadda caleemo saarka oo xilligan ka bilaabatay magaalada Kismaayo ayaa lagu wadaa inay khudbad ka jeediyeen siyaasiyiinta iyo madaxda ka qeyb galeysa, iyadoo aysan jirin waanwaan laga dhex wado maamulka Jubbaland iyo madaxda dowladda Somalia.
