Guddiga Doorshooyinka oo ka mida guddiyada Qaran ee dhowaan Baarlamaanku ansixiyay ayaa guddoomiye u doortay Xaliimo Ismaaciil Ibraahim (Xaliimo Yarey) kadib shir xubnaha guddiga ay ku yeesheen magaalada Muqdisho oo lagu dooranayay guddoomiye guddigu yeesho.
Kulanka oo guddigan maanta yeesheen ayaa waxaa goobjoog ka ahaa mas’uuliyiin ka tirsan Wasaaradda Arrimaha Gudaha Soomaaliya. Doorashadan ayaa kasoo horjeeda dadaal loogu jiray in xal loo helo khilaaf ka dhex taagnaa Xaliimo Yarey iyo Khadiijo Cosoble oo labadaba u sharaxnaa jagada guddoomiyaha Guddiga doorashada. Khadiijo Cosoble ayaa maalintii Sabtidii dhaawac jab ah ka soo gaaray lugta iyadoo ku dhacday gurigeeda, waxayna dalbatay in dibn loogu dhigo doorashada muddo 4 maalmood ah oo aanay socon karin, laakiin waxaa muuqata in codsigeedii la diiday
Xaliimo Ismaaciil ayaa heysatay taageerada madaxweynaha iyo wasiirka arrimaha gudaha iyo waliba inta badan xubnaha guddiga oo 9 xubnood ka kooban laakiin waxaa laga cabsi qabaa in Khadiijo Cosoble ka biyo diido doorashadan, taasoo khilaaf ka dhex abuurti karta guddigan.
Akhri: Yaa noqonaya Guddoomiyaha Guddiga Doorashada? (Laba haween caan ah oo isku heysta)
Xaliimo Ismaaciil ayaa ah qof muran badan ka taagan yahay oo howlaha siyaasadda ku lug lahayd tan iyo xiligii kala guurka iyadoo xulistii xildhibaanada Baarlamaanka ay dhibaato weyn ka abuurtay markii ay diiday xildhibaanadii hore u ahaa hogaamiye kooxeedyada oo markii danbe cod loo qaaday. Waxay kaloo guddoomiye ka ahayd guddigii farsamada ee maamul u sameynta Galmudug oo mar ay dhacday in ergo shirka ka mida ay gacan ula tagaan.
Xildhibaanada Baarlamaanka ayaan taageero weyn u heynin, iyadoo ahayd xubintii ugu codka yareyd ee guddiga markii Baarlamaanku u codeeyay xubnaha gudigga kamida, waxayse ku badbaaday olole ay galeen madaxweyne Xasan Sheekh iyo wasiirkiisa arrimaha gudaha. Sidoo kale maamulada dalka ka jira ayaa ka horjeeda doorka siyaasadeed iyo isbaheysiga kala dhaxeeya madaxweynaha iyo kooxdiisa.
Wadani.com
[ad name=”HTML-1″]
