Dagaalyahanada Xamaas ayaa maanta Gantaallo dhowr ah weerartay magaalooyinka Israa’iil oo ay ka mid tahay caasimadda Tel Aviv.
Weerarkan Sawaariiqda ahaa ayey sheegeen Garabka hubeysan ee Xamaad oo loo yaqaan ‘CISADIIN AL-QASAAM’ inay uga argoosanayaan duqeymo ay xaley Israa’iil ka geysatay xero qaxooti oo ku taalla Qaza oo lagu dilay 14 oo ka kooban laba qoys, u badnaa caruur iyo haween.
Israa’iil ayaa sheegtay inay qof Yuhuud ah uu ku dhintay weerarka, ayna ku dhaawacmeen in ka badn 40 qof, waxaana dadka lagu amray inay Guryahooda joogaan ama ay ku xeroodaan dhulka hoostiisa.
Dhinaca kale Militeriga Israa’iil ayaa duqeyn la beegsaday Daar weyn oo ku taalla magaalada Gaza, kaasoo ay deganaayeen Telefishanka Aljazeera iyo wakaalada wararka Mareykaka ee AP, waxaana si toos loo daawanayey burburka Daartaasi oo dadkii ki noolaa loo digay, kadibna gantaallo lala dhacay lagu burburiyey.
Saacad ka hor Gantaalaha lagu burburiyey waxaa milkiilaha dhismaha lasoo xiriiray sarkaal ka tirsan Sirdoonka Yuhuudda oo ku sheega inay heystaan saacad qura si ay uga baxaan Daartaasi oo la weerarri doono.
Agaasimaha guud ee Wakaalada Wararka AP, Gary Pruitt ayaa fal argagax leh ku tilmaamay duqeynta lagu baabi'iyey Daartii ay deganaayeen, isagoo yiri: "Waxaan aad uga naxay in milatariga Israel ay bartilmaameedsadaan oo ay burburiyaan dhismaha guryaha xafiiska xafiiska AP iyo ururada kale ee warbaahinta ee Gaza", wuxuuna intaas ku daray in AP ay macluumaad ka faahfaahin ka rabto dowlada Israel.
Dhismaha oo ka koobnaa 12 dabaq waxaa ku yaallay xafisyo iyo guryo, waxaana uu ka mid ahaa dhismooyin waaweyn oo diyaaradaha dagaalka Yuhuudda ay dhulka la simeen oo qaarkood lagu dilay dadkii ku noolaa.
