Mashuurca AMISOM oo soo bilowday sanadkii 2007 waxaa lagu asaasay ciidamo ka socday dalka Uganda oo bedelay ciidamadii Itoobiya ee Soomaaliya ku soo duulay sanadkii 2006-da.
Muranka u dhaxeeya Midowga Yurub iyo Midowga Afrika ee ku saabsan ciidamada AMISOM ee ka howlgala Soomaaliya ayaa soo shaaciyay xaqiiqooyin badan oo ku saabsan mashruuca 10 sano jirsaday ee ciidamada Midowga Afrika ka jooga Soomaaliya.
Midowga Yurub ayaa u muuqda inuu ka cago jiidayo kharashaadka faraha badan ee uga baxa howlgalka AMISOM ee Soomaaliya, horaantii sanadkan ayuu jaray 20% lacagtii uu siin jiray AMISOM, taasoo keentay in mashruuca dhibaato soo wajahdo.
Go’aankii labaad ee Midowga Yurub ayaa noqday inay ciidamada Burundi ee ku sugan Soomaaliya ay si toos ah u siinayaan mushaarka, kadib markii ay isku dhaceen madaxweynaha Brundi iyo Midowga Yurub. Arrintan waxaa si weyn uga hor yimid dalalka ciidamadu ka joogaan Soomaaliya.
Kharashaadka AMISOM
Kharashka bil waliba ku baxa howlgalka AMISOM ayaa gaaraya 30 milyan oo doolar, laakiin midowga Yuurb ayaa hoos u dhigay, waxaana la gaarsiiyay 22 milyan oo Doolar.
Ciidamada AMISOM ee gaaraya 22,00 wuxuu bil waliba qaataa askari kasta lacag dhan: $1028. Dowladaha ciidamada u diray Soomaaliya ayaa askari kasta ka jarta lacago maamulka dowladda ah, tusaale ahaan Kenya waxay askari waliba ka jarataa lacag dhan $200.
TIRADA CIIDAMADA DAL WALIBA KA JOOGA SOOMAALIYA
Brundi: 5,432 | Djibouti: 960 | Eithopia: 4,395 | Kenya: 3,664 | Uganda: 6,223
AMISOM waxay hadda wadaa qorshe kale oo ay ku dooneyso in ciidamo dheeraad ah oo gaaraya 4000 askari loo maalgeliyo.
Lacagaha mashruuca AMISOM ku baxay waxa ka mida mushaar ay qaataan ciidamada iyo Booliska AMISOM, shaqaalaha caalamiga ah mushaarkooda, shaqaalaha gudaha iyo kharaskaadka howlgalka xafiiska Nairobi
Dhibaatada heysta ciidamada AMISOM ayaa ah dib u dhac ku yimaada mushaarka ciidamada oo mararka qaarkood ay dhacdo in ka badan 6 bilood inay maqnaato lacagta mushaarka. Heshiis ay bishii September kala saxiixdeen Midowga Yurub iyo Midowga Afrika, kadib wadahadallo la isku xiiqay ayaa lagu ogolaaday in la bixiyo mushaarka ciidamada AMISOM 9-kii bilood ee la soo dhaafay oo gaaraya 178 Milyan oo Euro.
AMISOM waxay hadda dooneysaa inay bishii hesho lacag dhan 300 Milyan oo Doolar si ay ay howlgalkeeda uga sii wado Soomaaliya.
Wadani.com
