Guddoomiyaha xilka laga qaaday ee gobolka Banaadir Xasan Maxamed Xuseen (Muungaab) ayaa ku gacan seyray kana hor yimid amar ay wasaaradda arrimaha gudaha iyo federaalka Soomaaliya dhowaan soo saartay oo ay uga joojisay in dowladda hoose ee Xamar ay wax dhaqdhaqaaq ah sameyso isla markaana lagu xayiray inuu Muungaab wax lacag ah kala baxo Bankiga dhexe.
Guddoomiya Muungaab oo saxaafadda la hadlay maanta ayaa sheegay in dowladda hoose ay qabato adeegyo dadweyne oo aanay suuragal ahayn inay howsha joojiso, taasina cid laga ogolaanayo aanay jirin ilaa ay xilka ka wareejinayaan. Wuxuu intaas ku daray in shaqadu soconeyso, isagoo faray agaasimayaasha shaqaalaha iyo kuwa waaxyada dowladda hoose inay shaqadooda si habsami leh u wataan.
Guddoomiyaha xilka baneynaya maalinta Isniinta ah ee toddobaadka danbe ayaa xaalad adag ka soo wajahday wasaaradda arrimaha gudaha oo dhowaan ka joojisay inuu wax lacag ah kala baxo khasnada dowladda hoose ee Muqdisho.
Wadani.com
