Madaxweynaha iyo Ra’iisal wasaara xilka sii haya ayaa si degdeg war-saxaafadeedyo iska horjeeda uga soo saaray Dacwadii Badda ee Kenya iyo Soomaaliya oo go’aan ay ka gaartay Maxkamadda ICJ.
Madaxweyne Xasan Sheekh ayaa shir jaraa’id qabtay wuxuuna sheegay inay guul u soo hoyatay dowladda iyo dadka Soomaaliyeed wuxuuna shacabka Soomaaliyeed ugu baaqay in ay ilaahay baryaan, si uu noogu guuleeyo in la helno Baddeena dacwada ku jirta ee maanta maxkamada caalamiga ah hor taalla.
Wuxuu sheegay in dowladda uu hogaamiyo aanay waxba kala harin sidii dacwadaasi loogu guuleysan lahaa, isla markaana ku raadjoogi doonto soo dhicinta xaqa ka maqan Soomaaliya.
Cumar C/rashiid ayaa warsaxaafadeed uu soo saaray kusoo dhoweeyay go’aanka Maxkamada ICJ ee dacwadda Badda Soomaaliya, wuxuuna sheegay in natiijadan ka timid dowladii uu isaga hogaaminayay e KMG ahayd iyo tan hadda jirta.
Wuxuu hambalyo u diray Qareenada Soomaaliya u doodaym, wuxuuna sheegay in arrinta Badda ay tahay mid u dhaxeysa laba dal ee aanay ahayn in la siyaasadeeyo.
Arrinta dacwada Badda ayaa u muuqata inay ka mid noqon doonto ololaha doorashada adag ee xilka madaxweynaha iyadoo go’aankeedu soo baxay xilli xasaasi ah.
Wadani.com
