Xiisad ayaa weli ka taagan Guri ku yaalla degmada Shangaani ee magaalada Muqdisho, kaasoo ay maanta ku dagaalameen ciidamo ka wada tirsan askarta dowladda Soomaaliya.
Arrinta gurigan ayaa bilaabtay markii ay saaka tageen ciidamo ka tirsan Hay’adda NISA, kuwaasoo ku amray dadka deganaa inay isaga baxaan, waxaana gurigaasi degan saraakiil ka tirsan ciidamada dowladda oo Boolis iyo milateri isugu jira, iyadoo markii dambe labada ciidan ay ku dagaalameen guriga.
Dagaalka ayaa dhaliyey xaalad kacsan iyo qasaare isugu jira dhimasho iyo dhaawac, waxayna wararku sheegayaan inuu halkaasi gaaray taliyaha ciidamada Gobolka Banaadir Col. Saadaq Joon oo kala qaaday ciidamada dagaalamay, laakiin waxaa dib ugu laabtay ciidamada NISA oo weli ku sugan Guriga oo ku yaalla agagaarka xarunta Taraafikada.
Dhinaca kale Qoyska leh Guriga lagu dagaalamayo oo sheegay in xoog looga heysto ayaa madaxda dowladda ka codsaday inay gurigooda kusoo wareejiyaan, waxayna sheegeen inay wax lala yaabo tahay lagu dagaalamo gurigooda.
Guriga ayaa la sheegay inuu yahay dhaxalkii Qoyska Cumar Fiqi Caalimow, waxaana muddo saddex sano ah dacwad ka socotay maxkamadda G/banaadir, iyagoo loo xukmiyey Qoyskaasi, balse aan weli lagu wareejin hantidooda.
Salmaan Cumar Sheekh Fiqi Caalimow ayaa sheegay in Guriga uu lahaa aabihiis ayna heystaan dhammaan dokumentiyadii loogu xukmiyey, wuxuuna ka codsaday madaxda sare ee dowladda inay arrintan wax ka qabtaan.
