Xiisad ayaa weli ka taagan magaalada Muqdisho, kadib markii askari ka tirsan Ciidamada Booliska uu toogasho ku dilay laba qof oo shacab ah, xilli uu ku howlahaa fulinta bandow lagu soo rogay caasimadda Muqdisho.
Dilka wiil dhalinyaro ah iyo haweeney ayaa yimid markii dadkan oo gurigooga hor fadhiya uu askariga ku amray inay xaroodaan, kadibna markii ay diideen uu rasaas ku furay, taasoo isu martay labada qof, waxaana markii hore geeriyooday wiilka, halka haweeneyda ay rasaasta u dhimatay wax yar kadib.
Sida uu sheegay Taliyaha Booliska askariga falkan geystay ayaa xabsiga la dhigay, waxaana magaciisa lagu sheegay Dable Booliis Xasan Aadan xasan (24 sano jir), iyadoo maxkamad lasoo taagi doono.
Dilka marxuumii Xasan Cali Cadaawe oo 24 sano jir ahaa iyo Madiino Cabdullaahi Cabdi oo 19 sano jir ahayd ayaa dhaliyay bannaabax caro wata oo ay dhigeen dadweynaha xaafada dilka ka dhacay, iyadoo dadka isu soo baxay ay gubeen taayaro, kana dalbadeen madaxda sare ee dowladda inay sharciga hor keenaan askariga dilka geystay.
Taliye ku xigeenka Zakiya Xuseen ayaa ku dooday in Bandowga uu in muddo ah saarnaa Muqdisho, wax dhibaato ahna aanu dhalin, arrintan dhacdayna ay ahayd hal shil oo sharciga la marsiin doono.
Banaanbaxyo kale ayaa saaka isu soo baxay iyadoo xiray waddo muhiim ah, waxaana laga cabsi qabaa inay bannaanbaxyo kale ka dhacaan magaalada Muqdisho.
Dad badan ayaa ka hor yimid Bandowga ay dowladu ku soo rogtay Muqdisho oo bilaabanaya 7-da Fiidnimo xilli Ramadaan lagu jiro, taasoo dhibaato ku ah dad fara badan, laakiin askarigan ayaa dadka shacabka ah u dilay inay bannaanka gurigooda ku sugnaayeen.
