Xildhibaan C/risaaq Cumar Maxamed ayaa sheegay in rasaastii lagu furay Kolonyadii uu la socday madaxweynihii hore Xasan Sheekh Maxamuud ay ahay isku day dil lagu khaarijin lahaa.
Xildhibaan oo hore u soo noqday Wasiirkii Amniga ayaa sheegay inay isaga iyo Taliyihii hore ee NISA C/llaahi Sanbaloolshe la socdeen Madaxweynihii hore, arrintaasina ahayd daandaansi aan la aqabali karin.
“Ra’iisal wasare Rooble waa inuu baaritaan ku sameeya isku dayga Dil ee ka dhanka ahaa madaxweynihii hore Xasan Sheekh Maxamud. Waxay arrintan dhacday daqiiqado ka hor. Aniga taliyihii hore Sanbalolshe ayaan la soconay Madaxweynaha..” ayuu yiri Xildhibaan C/risaaq Cumar Maxamuud.
Xildhibaan ayaa sidoo kale wareysi uu bixiyey ku sheegay in rasaasta lala beegsaday Gaariga ka mid ahaa kuwa uu Xasan Sheekh Maxamuud adeegsado oo gaari kale oo ku xigay uu saarnaa, haddii ujeedku yahay is-rasaaseyn ay noqon lahayd mid dhex marta ciidamada, balse si toos ah loo beegsaday Gaariga, isagoo ku eedeeyay inay rasaasta bilaabeen ciidamada Asluubta ee barta ku sugnaa, ayna u yeerteen ciidamo milateri oo xoojin ah.
Wuxuu sheegay inay tallaabadaasi ahayd daandaansi aan la aqbali karin oo ka dhan ah madaxweyne Xasan Sheekh Maxamuud.
