Xildhibaan Mahad Maxamed Salaad oo ka mida xildhibaannada Baarlamaanka Federaalka ayaa su’aalo adag ka keenay qaabka loo sii daayey Nin ku eedeysnaa inuu madax u yahay Amniyaadka Alshabaab oo ciidamada dowladda Somalia ay qabteen 2 sano ka hor.
Xildhibaanka oo ka mida mucaaradka ku kacsan madaxda dowladda Federaalka ayaa soo bandhigay 4 su’aalood oo shaki gelinaya warka xalay soo saartay dowladda Federaalka oo ku saabsan in Cabdiwaaxid Khaliif Ciise (Ciise Tarabuun) uu dhammeystay laba sano oo xarig ahaa, kadib markii ay Dowladda Kenya shaacisay inuu dalkeeda soo galay, waxaana su’alihiisa ka mid ahaa:.
1. Ciise Tarabuun markii la soo qabtay 19-kii June 2017 Wasiirka Amniga Xukuumadda Soomaaliya wuxuu sheegay in amarkiisa lagu dilay boqolaal mas’uuliyiin dowladeed, saraakiil, askar, ganacsato iyo shacab isugu jira marka sidee labo sano kaliya loogu xukumay?
2. Goormee la go’aamiyay in sidaan loo fududeeyo xukun ciqaabeedka saraakiisha Al-Shabaab ee bixiya amarada dilalka Al-Shabaab fuliyaan, dhalinyaradii ay adeejinayeena ciqaab daran la marsiiyo?
3. Ciise Tarabuun waxaa la soo qabtay 19-kii June 2017, labo sano xabsi ah iyo labo bilood oo la socosho ahna waa soo dhamaystay sida aad sheegteen, July 2019 waa dhoofay. Marka hadii labada bilood ee dheeriga ah loo jaro maalmaha fasaxa iyo munaasabadaha ma 11 beri kaliya ayaa maxkamadayntiisu socotay?
4. Maxkamadaynta saraakiisha iyo maleeshiyaadka Al-Shabaab ee la soo qabto soo tii warbaahinta dowlada laga baahin jiray, maxaa qudbo siro ka dhigay mida Ciise Tarabuun. Hadii la xukumay, mudadiina uu dhamaystay maxaa loo shaacin waayay kahor intii aysan sheegin dowlada Kenya?
Wuxuu xildhibaan Mahad Salaad ku soo gabagabeeyya qoraalkiisa “Been Dal laguma maamuli karo ee dowladnimada yaan la micno tirin. Dalkana cadow loo hodin!..”
