Xildhibaan Mahad Salaad oo ka mida xildhibaannada Baarlamaanka Federaalka ayaa tirakoon uu iskiis isu xil saaray ku soo sameeyay dhimashada iyo dhaawaca ka dhashay qaraxii magaalada Muqdisho maanta ka dhacay.
Xildhibaanka oo tegay isbitaalada magaalada ayaa warbixintiisa ku sheegay inuu guud ahaan soo arkay 16 meyd ah iyo dhaawac gaaraya 42, wuxuuna intaas ku daray inay dad la geeyay isbitaallo kale oo aan ahayn kuwa uu booqday.
“Dhimashada iyo Dhaawacyada aan kusoo arkay Isbitaalada Madiina, Digfeer iyo Daru Al-Shifaa waa sida soo socota: Isbitaal Madiina waxaa yaala 16 MAYD ah iyo 20 DHAAWAC ah oo uu kujiro Xildhibaan hore Cabdulqaadir Shacab AUN. Isbitaalka Daru Al-Shifaa waxaa yaala 14 DHAAWAC ah. Isbitaalka Digfeer waxaa yaala 8 DHAAWAC ah. Waxaa jira Isbitaalo kale dhowr ah oo la geeyay dhaawacyo tiradooda aanan xaqiijin karin..” ayuu yiri xildhibaan Mahad Salaad oo sheegay in Qaraxa maanta uu ahaa kii 14aad ee ka dhaca Magaalada Mogadishu mudo asbuuc gudihiis ah.
Hay’adda amniga dowladda ayaa muddooyinkii dambe ka gaabsadayama ka xishooday inay ka hadlaan qaraxyada ka dhaca Muqdisho oo is daba joog noqday, waxayna taasi furtay inay howshaasi la wareegaan qaar ka mida xildhibaannada Baarlamaanka.
