Xildhibaan Mahad Maxamed Salaad oo ka mida xildhibaan Baarlamaanka Federaalka ayaa su’aal ka keenay haddii ergo iyo odayaal doorayaan xildhibaannada Baarlamaanka 11-aad looga ilaalin karo inay doortaan xildhibaan Alshabaab ah.
Xildhibaanka ayaa ku dooday suuragalnimada in Alshabaab door ku yeeshaan doorashada soo socota 2020 – 2021, mar haddii ergadii 14-ka kun ahayd ee sanadkii 2016 soo doortay 275 Xildhibaan Golaha Shacabka ay intooda badan noqdeen kuwa la dilay, kuwa Alshabaab isku dhiibay, kuwa ka cararay dalka iyo kuwa afar sano dhuumaaleysi ku jiray.
“Haddaba, su’aashu waxay tahay: Ku dhowaad 83 kun ee hadda wax ha doorteen la yiri xagee laga keenayaa, haddiise ay noqoto in la helo maxaa damaanad ah oo ay heystaan in aysan mari doonin wadadii ay mareen kuwii iyaga ka horeeyay?” ayuu is weydiiyey Xildhibaan Mahad Salaad oo daba dhigay su’aal kale oo ah in ergo iyo odayaal Alshabaab ah ka mid noqon karaan ergada soo socota.
“Sidee looga ilaalinayaa odoyaashii iyo ergadii isku dhiibay Alshabaab in ay ka soo mid noqdaan kuwa hada wax dooranaya, si inta u soo xulaan ergo Alshabaab aysan u soo dooran Xildhibaan Alshabaab ah?” ayuu ka digay Xildhibaan Mahad Salaad.
