Xildhibaan C/qaadir Cosoble Cali oo ka tirsan Baarlamaanka Federaalka, kana mida Madasha xisbiyada Qaran ayaa shaaciyey in Madaxweyne Maxamed C/llaahi Farmaajo uu ballanta uga baxay dadka Muqdisho.
Xildhibaan Cosoble oo si weyn ugu ololeeyay maqaamka Gobolka Banaadir ayaa farriin uu u diray Madaxweyne Farmaajo ku sheegay inuu Golaha Shacabka ka codsaday in Goobolka Banaadir xubno laga siiyo Aqalka Sare, balse markii Baarlamaanku ansixiyey 13 xubin uu ballantii ka baxay, isla markaana saxiixi waayey xeerkii Baarlamaanka ansixiyay.
“Haddii ay dhab kaa tahay maqaamka Gobolka Banaadir waxaad kusoo dari lahayd heshiiskii Doorashada Dhuusamareeb oo adiga aad diyaarsatay.. waxaa muuqata inaysan daacad kaa ahayn dhabna kaa ahayn xuquuqda Gobolka Banaadir ee Aqalka Sare, maxaa yeelay ilaa hadda sharcigii Golaha shacabka ansixiyey miiskaada ayuu saaran yahay, waana saxiixi la’dahay..” ayuu yiri xildhibaan C/qaadir Cosoble.
Wuxuu ugu baaqay Madaxweyne Farmaajo inuu fuliyo balankii uu qaaday sidii dadka Banaadir ay xuquuqdooda ku heli lahaayeen. “Heshiiskii Dhuusamareeb 3 wuxuu soo shaac bixiyey inuu Madaxweyne Farmaajo u socday Doorasho Qof iyo Cod ah..” ayuu farriintiisa ku yiri xildhibaan C/qaadir Cosoble.
