Buuq iyo fowdo ayaa hareeyay fashigii labada Gole ee Baarlamaanka Federaalka Soomaaliya oo maanta la filayey in looga doodo Miisaaniyadda Dowladda Federaalka Soomaaliya.
Xildhibaannada mucaaradka ayaa qaarkood is hortaagay inuu furmo kulanka, waxayna qaarkood dul fuuleen Miisaskii Guddoonka iyo Goobtii ay xildhibaannada ka hadlayeen, waxayna xaaladii isu bedeshay fowdo.
Xildhibaannada fowdada ka sameeyay fadhiga labada Aqal ee Baarlamaanka ayaa diidanaa in hal mar la galo xisaabxirka Miisaaniyadii hore iyo Miisaaniyadda cusub, waxayna dalbanayeen in la kala qaado.
Sidoo kale xildhibaannada Mucaaradka ayaa diidanaa inuu shirka labada Gole guddoomiyo Cabdi Xaashi, iyagoo ku doodaya inuusan jirin xeer ay ku wada shaqeeyaan labada Gole.
Waxaa shirka guddoominayay Guddoomiyaha Aqalka Sare Cabdi Xaashi C/llaahi, iyadoo Sheekh Aadan Madoobe uu ahaa ku-sime Madaxweyne, xilli uu dalka ka maqan yahay madaxweynaha.
Buuq iyo fowdo xoog leh kadib ayuu Guddoomiye Cabdi Xaashi soo xiray kulankii, waxaana lagu kala tegay fadhigii, iyadoo aan kulankii la furin wax shaqo ahna bilaabin.
Dooda ka taagan ajandooyinka Miisaaniyadda ayaa ahayd mid fudud, balse waxaa arrinta dhaliyay iyadoo ay xiisad xoog leh ka taagan tahay Arrinta Wax ka bedelka Dastuurka oo xildhbaannadu ku kala qeybsan yihiin.
