Laba xildhibaan oo ka tirsan Baarlamaanka Soomaaliya, kana soo jeeda Galmudug ayaa si iska horjeeda uga hadlay ciidamada Itoobiya ee la geeyay magaalada Dhuusamareeb, iyadoo isku naqdiyey baraha bulshada.
Xildhibaan C/xakiin Macalin Axmed ayaa sheegay inaysan waxba ka jirin wararka lagu sheegay in Dhuusamareeb la geeyay Ciidama Itoobiyaan ah oo aan AMISOM ka tirsaneyn, wuxuuna ku dooday in Ciidamada Jabuuti iyo kuwa Itoobiya ay horay u joogeen magaalada Dhuusamareeb muddo aan ka yareyn saddex bilood, kana wada tirsan yihiin AMISOM.
“Waa dhacdaa in ciidamadu ay sameeyaan dhaqdhaqaaq xagga kala bedelka ciidanka ama logistic-ada ah… Waxaase nasiib darro ah in Madasha xisbiyada Qaran oo markii hore loo aasaasay in wax lagu saxo uu hadalkaan aan la hubsan ka soo baxo..” ayuu yiri xildhibaanka C/xakiin oo ka mida dadka taageersan musharaxa madaxweynaha Galmudug ee dowladda Federaalka wadato.
Dhianca kale Xildhibaan Mahad Maxamed Salaad ayaa iska sheegay in ciidamada Itoobiya ay dharaar cad soo galeen magaalada Dhuusamaeeb oo aysan ahayn in la inkiro haddii aan la sheegi karin ama ay yihiin wax xun.
“Maanta waxaa noo shidan riwaayadii oo magaca laga badalay “CIIDAMADO ITOOBIYAAN AH MA ARAGTAY. MA ARKIN DHEH”. Dadku indho la’aan maahan, ciidamadana dharaar cad ayay magaalada soo galeen ee habeen saqdii dhaxe guuro kuma soo gelin ee maxaa loo inkirayaa. Hadiise wax xun ay yihiin oo aan la sheegan karin maxaa markii hore loo dalbaday?!..” ayuu yiri Xildhibaan Mahad Maxamed Salaad oo u jawaabay xildhibaan C/xakiin Macalin.
Xildhibaan Mahad Salaad ayaa ka mida xildhibaananda sida weyn u taageersan musharaxa xilka madaxweynaha ee Galmudug C/raxmaan Odowaa.
