Wasaaradda Maaliyadda dowladda Federaalka Soomaaliya ayaa dhowaan kordhisay canshuurta laga qaado badeecadaha kala duwan ee ka soo dega dekadda weyn ee magaalada Muqdisho, iyadoo go’aankaasi uu dhibaato weyn ku keenay shaqadii dekadda.
Qoraal ka soo baxay Wasiirka Maaliyadda Maxamed Ibraahim Aaden (Fargeeti) ayaa lagu kordhiyay dhammaan shixnadaha ka soo dega dekadda Muqudisho oo ay ku jiraan: Raashinka, Bagaashka, Baabuurta, qalabka dhismaham waxayna saameyneysaa arrintan ilaa 70 shey oo dekadda yimaada.
Qiimaha canshuurta ee la kordhiyay ayaa gaareysa 25%, waxayna arrintaasi keentay in Maraakiibta ganacsiga ay ka biyo diidaan canshuurtaasi, iyadoo ciidamada dekadda ay ku qasbeen maraakiib dekadda ku sugnaa inaysan bixi karin iyagoo aan dhiibin canshuurta cusub.
Wasiirka Fargeeti ayaan la ogeyn wax ku kalifay inuu xilligan ay dabeylaha waaweyni ka dhacayaan badweynta hindia uu kordhiyo qiimaha canshuurta intaas la eg, waxaana uu diiday wasiirku talo ay u soo jeediyeen inta badan agaasimeyaasha wasaaradda maaliyadda oo ahayd in canshuur kordhinta ay noqoto mid dekadaha kale ee dalka saameysa.
Shaqadii Dekadda ayaa hakad weyni soo galay kadib canshuur kordhinta uu sameeyay wasiirka Maaliyadda ee laga dhaqan geliyay Dekadda Muqdisho, waxaan suuqyada Muqdisho laga dareemay arrintan oo sicir barar ku keentay dhammaan badeecooyinka kala duwan.
Lama oga in xukuumadda Soomaaliya ka war qabto arrintan, laakiin warar ku dhowdhow Wasaaradda Maaliyadda ayaa sheegaya inay wasiir Fargeeti u gaar tahay, waana wax laga xumaado in wasiir qura uu ku dhaqaaqo tallaabo weyn oo sidaas oo kale ah.
Wadani.com
