Madaxweynaha dowladda Fedeeraalka Soomaaliya ayaa ku dhaqaaqay tallaabo aan la fileyn oo lidi ku ah balanqaadkiisii ahaa inuu la diriri doono musuqmaasuqa, iyo farriintiisii uu dhowaan ka jeediyay Baarlamaanka ee ahayd inaan loo dulqaadan qofkii Musuqmaasuq lagu eedeeyo oo sharciga loo daayo (Akhri maqaal Goobjooge.com ka qortay farriintii Madaxweynaha).
Goobjooge.com ayaa xaqiijisay in Madaxweyne Xasan Sheekh Maxamuud amar ku siiyay Hanti dhowrka guud ee Qaranka Prof. Nuur Jimcaale Faarax inuu gebi ahaanba joojiyo baaritaanada iyo wixii la xiriira warbixinada wasiirada lagu helay musuqmaasuqa ee ay shaaciyeen dhowaan hanti-dhowrka iyo Xeer ilaalinta inta laga gaarayo dhammaadka bisha Maarso 2015.
Xasan Sheekh ayaa Hanti dhowrka guud amray inuu isku laabo kiisaska ku saabsan eedeynta iyo dacwada Hanti dhowrku waday ee ku saabsaneyd wasiirada xukuumadii hore, wuxuuna taas sabab uga dhigay in wasiirada ku eedeysan musumaasuqa laga yaabo inay qaarkood dib u soo noqdaan oo loo magacaabo wasiirada cusub ee xukuumadda dhowaan la dhisi doono. Amarka madaxweynaha ayaa ku saabsanaa in la xiro kiisaska musuqmaasuqa ee hanti dhowrku soo helay, kana diyaariyay warbixino dhameystiran oo la siiyay madaxda hay’adaha dowladda.
Hanti dhowrka guud ayaa la sheegay inuu qaatay amarka madaxweynaha, iyadoo wararku sheegayaan inuu si weyn ula yaabay go’aanka madaxweynaha iyo amarkiisa. Wasiiro badan oo qaarkood madaxweynaha u dhow yihiin ayaa baaritaano lagu sameeyay lagu helay wax is daba marin, sida xeer ilaaliyaha iyo hanti dhowrka ka sheegeen fadhiga Baarlamaanka. (Akhri warkooda).
Goobjooge.com
Muqdisho
[ad name=”HTML”]
