Madaxweynaha Puntland C/weli Gaas ayaa guul siyaasadeed oo ciriiri gelisay kala hor yimid Madaxweynaha Soomaaliya Xasan Sheekh , kadib dood kulul oo ku dhex martay shirka maalintii saddexaad uga socda madaxda Madasha Qaran magaalada Muqdisho.
C/weli Gaas ayaa ku doodaya in Muqdisho ama Gobolka Banaadir aanu jirin qaab uu hadda xubno uga yeelan doono Aqalka sare ee Baarlamaanka, taasina uu mas’uuliyadeeda qaadayo Xasan Sheekh Maxamuud, maadaama isaga iyo maamulada Galmudug iyo Koonfur Galbeed ay hore u diideen in hab gobol ama degmo lagu qeybiyo xubno Aqalka sare.
Madaxweynaha Puntland ayaa si cad uga sheegay shirka in haddii degmo lagu saleyn lahaa uu gobolka Banaadir heli lahaa qeyb libaax, haddii qaab gobol lagu saleeyo sida dastuurku sheegayana uu qeybtiisa ku yeelan lahaa aqalka sare balse aanay suuragal ahayn in maamul goboleed uu Banaadir wax ku helo.
Arrintan oo garowshiyo laga bixiyay ayaa xujo ku noqotay doodii madaxweyne Xasan Sheekh iyo madaxda Galmudug iyo Koofur, waxaana hadda la raadinayaa qaab looga gudbo arrinta aqalka sare iyo gobolka Banaadir.
Wadani.com
