Isbedal aan la fileyn ayaa laga dareemay madaxweynaha Galmudug Axmed Cabdi Kaariye (Qoorqoor), kadib shirkii jaraa’id ee uu xalay saqdii dhexe ku qabtay magaalada Dhuusamareeb, isagoo ka hadlay in la furay shirkii Dhuusamareeb III.
Xogta aanu helnay ayaa sheegeysa inuu Axmed Qoorqoor heshiis hoose la gaaray Madaxweyne Farmaajo, kaasoo qof uu wato loogu magacaabayo Ra’iisal wasaare cusub, taas bedelkeedna uu madaxweynaha Galmudug taageerayo qorshaha Madaxweyne Farmaajo ee Doorasho Qof iyo Cod ah oo salka ku heysa muddo kordhin loo sameeyo dowladda hadda jirta.
Qoorqoor ayaa dhow musharax oo uu wato u gudbiyey Madaxweyne Farmaajo si uu xilka Ra’iisal wasaaraha ugu magacaabo, iyadoo ay soo baxeen ilaa saddex magac oo ka mida musharixiinta uu wato Madaxweynaha Galmudug oo kala ah: Axmed C/salaan Aadan, Cawaale Kulan iyo C/kariin Guuleed.
Heshiiskan ayaa keenay inuu cadaadis kale fuulo madaxweynayaasha Hirshabeelle iyo K/Galbeed, kadibna waxaa dhacday inuu Qoorqoor fududeeyay dhismaha Guddiga Farsamada uu la wareego Madaxweyne Farmaajo ayna ku shaqo bilaabaan caasimadd Muqdisho, iyagoo ka mid ahayn xubnihii ka socday Puntland iyo Jubbaland, waxaana ku xigay inuu ku dhawaaqo inuu furmay shirkii Dhuusamareeb 3, isla markaana laga heshiiyay Doorashada.
Madaxweynaha Galmudug Axmed Cabdi Kaariye ayaa xalay si cad u sheegay inuu furmay shir ay ka maqan yihiin madaxweynayaasha Puntland iyo Jubbaland, isagoo weliba meesha ka saaray qodob ka mida kuwa ugu weyn ee ay ku doodayaan oo ah in Beesha caalamka ay damaanad qaado fulinta heshiiska lagu gaaro shirka.
